Գիսանե Պալյան. «Մեր երկրում շատ անարդար բաներ կան»

«Էմփիրեյ» խմբի երաժիշտ, երգահան Գիսանե Պալյանն արագ կողմնորոշվեց իր «ոչ»-երը տարանջատելիս: Երաժշտի «ոչ»-երից մեկը նույնիսկ դուրս մնաց մեր էջից: Իսկ ահա որևէ երևույթի կամ փաստի «այո» ասելը մի քիչ բարդ էր Գիսանեի համար :) Իր «այո»-ների շարքում երգահանն առաջինն առանձնացրեց բազմազավակությունը՝ փաստելով նաև սեփական փորձը:

«ԱՅՈ»
Ուրախ եմ, որ կան մարդիկ, ովքեր իսկապես սիրում են մեր երկիրը, փորձում են պահպանել օրենքները, չեն ստում ու դեռևս չեն լքել հայրենիքը: Ասում եմ' «այո» այդ մարդկանց, քանի որ այսօր շատերն են հեռանում: Չնայած մեծ դժվարություններին, հայրենիքում մնացողները հույս են ներշնչում, որ մեր երկիրը դեռ առաջ գնալու, զարգանալու հնարավորություն ունի:

«ՈՉ»
Մարդիկ անտարբեր են իրար ցավերի, խնդիրների, կարիքների նկատմամբ և չեն մտածում, որ մի օր էլ իրենք կարող են կարիքի մեջ հայտնվել: Ասում եմ՝ «ոչ» անտարբերությանը, քանի որ փոքրիկ անտարբերությունը, ի վերջո, ծնում է ավելի մեծը, ինչը շատ վատ ու ցավալի երևույթ է:

«ԱՅՈ»
Ես երեք երեխա ունեմ և շատ եմ ուրախանում, երբ տեսնում եմ բազմազավակ ընտանիքների: Թեև ասում են, թե շատ երեխաներ պահելն այսօր դժվար է, բայց կածում եմ՝ մարդու ցանկությունից է դա կախված: Ճիշտ է, դժավարություններ էլ են լինում, բայց ես և ամուսինս միմյանց սատարելովª փորձում ենք հասցնել ամեն ինչ: Ասում եմ՝ «այո» բազմազավակությանը:

«ՈՉ»
Մարդիկ անտարբեր են իրար ցավերի, բայց ոչ անձնական կյանքի նկատմամբ: Շատերը մեծ հետաքրքրությամբ քննարկում են, թե հարևանն ումից երեխա ունեցավ, ում ուղեկցությամբ տուն եկավ և այլ խիստ անձնական հարցեր: Ասում եմ՝ «ոչ» քիթն ուրիշի կյանք մտցնելուն, քանի որ դա անձնական կյանք չունենալու արդյունք է:

«ԱՅՈ»
Լավ է, որ կան բարեգործական կազմակերպություններ, որոնք համախմբում են այն մարդկանց, ովքեր ցանկություն ունեն օգնելու կարիքավորներին, հիվանդներին: Մենք հաճախ ենք համագործակցում նման կազմակերպությունների հետ, ու ինքս տեսնում եմ, թե ինչ նվիրումով են աշխատում դրանց աշխատակիցները: Ասում եմ՝ «այո» բարեգործությանը:

«ՈՉ»
Շատ մարդիկ իրենց «տեղում» չեն. թեկուզ մեր նախարարություններում՝ քանի՞ նախարար մասնագիտական կրթություն ունի: Նույնն էլ երգարվեստում է: Շատերը ո´չ ձայն ունեն, ո´չ տաղանդ, բայց ունեն գումար ու հնարավորություն՝ առաջ գնալու: Նրանց անորակ երգերը պրոպագանդվում է հեռուստատեսությամբ, ու արաբական և պարսկական երաժշտությունը ներկայացվում որպես հայկական: Ասում եմ՝ «ոչ» վատ երաժշտությանն ու ոչ պրոֆեսիոնալիզմին:

«ԱՅՈ»
Համացանցը մեծ հնարավորություններ է ընձեռում: Լինելով շատ զբաղված՝ հաճախ եմ օգտվում դրանից: Դա որոշակիորեն սահմանափակում է առերես շփումը, բայց այն և´ տեղեկություններ ստանալու, և´ շփման առումով զբաղված մարդկանց համար հիանալի միջոց է: Այլ խնդիր է, որ պետք է ճիշտ գործածել այն և հետևողական լինել՝ երեխաները որքան ժամանակ են անցկացնում համակարգչի առաջ և ինչու: Ասում եմ՝ «այո» համացանցին և դրա ճիշտ գործածմանը:

«ՈՉ»
Մեր երկրում շատ անարդար բաներ կան՝ սկսած նրանից, որ տաղանդավոր, մտավոր և ֆիզիկական մեծ հնարավորություններով մարդիկ մնում են ստվերում, վերջացրած թոշակառուներով, ովքեր ստանում են նվաստացուցիչ թոշակ, ինչը չի կարող փակել նրանց ծախսերը: Ասում եմ՝ «ոչ» անարդարությանը: Կարծում եմ՝ թոշակառուների թոշակի չափը պետք է փոխվի, իսկ եթե ղեկավարությունն ասում է, որ չի կարող լուծել այդ խնդիրը, ուրեմն չպետք է ղեկավարի:

Նյութը՝ esyes.am-ի