Չափազանցություններն՝ ըստ Շուշաննա Թովմասյանի և Սոնա Շահգելդյանի

Ես այնքան գեր եմ
Մենք հաճախ ենք սա ասում, և նույնիսկ կարևոր չէ, որ դա հիմնականում այնքան էլ այդպես չէ: Քառասուն չափս ունեցող աղջիկներին թվում է՝ իրենց կոնքերը լայն են, անգամ կարողանում են ցելյուլիտ կամ այլ թերություններ «հայտնաբերել»: Իսկ հիսուներկու չափս ունեցող աղջիկներին թմբլիկ են թվում այտերը: Ամեն դեպքում բավական է՝ քեզ կեղեքես: Դու այնպիսին ես, ինչպիսին կաս, պետք է սիրես ու գնահատես քեզ, թե չէ ո՞վ պետք է սիրի քեզ քո փոխարեն: Բավական է փնթփնթալ ու կառչել ամեն ինչից. դու գեղեցիկ ես և քանի որ նման չես ամսագրերի շապիկների գեղեցկուհիներին, ավելի լավն ես դառնում:

Դա ինձ համար չափազանց է
«Չափազանց» կարող է թվալ ամեն ինչ՝ գաթա ուտելը, ողջ գիշեր պարելը, կարճ կիսաշրջազգեստ հագնելը: Իսկ գուցե պարզապես վախենո՞ւմ ես: Կյանքը մեկ անգամ է տրվում և երբեմն հարկավոր է ընդառաջել ցանկություններին, անել միայն այն, ինչ սիրտդ իսկապես շատ է ուզում: Իսկ համոզմունքները, ինչ-որ մեկի գնահատականները, կանոնները կարող են ուղղակի հնացած նախապաշարմունքներ լինել, որոնք պետք է պարզապես փշրել: Ինքդ մտածիր. երբեք ուշ չէ օդապարիկով թռչել, բայց դժվար թե հիսուն տարեկանում հաջողվի պարել ողջ գիշեր: Վայելի՛ր կյանքը:

Կյանքն ավարտված է
Կրիտիկական իրավիճակներում ամենավիրավորականն այն է, որ կյանքն ավարտված չէ, և հաստատ այն կվերապրես, ինչ էլ պատահի: Քեզ մի՛ կոտորիր և հիստերիայի մեջ մի՛ ընկիր: Եթե այս նախադասությունը հաճախ կրկնես, քեզ վրա այլևս ուշադրություն չեն դարձնի: Ավելի լավ է' նայիր շուրջբոլորդ և «անջատվիր» նրանից, ինչն «ավարտվում» է, և «միացիր» նրան, ինչն անհագուրդ ուշադրություն է պահանջում. ասենք' բարեկամները, դասերն ու ընկերները: Եթե կարողանաս ժամանակին «միանալ», կյանքը կհարթվի:

Շուշաննա Թովմասյան
Դերասանուհի Շուշաննա Թովմասյանը ժամանակ առ ժամանակ իր մասին չափազանցություններ է լսում: Ինձ մեկ-մեկ ասում են՝ շատ նիհար եմ, որ շրջազգեստ չհագնեմ, սակայն ինքս չեմ նեղվում դրանից և չեմ կարծում, որ այդքան նիհար եմ. հայելու մեջ նայելիս ինձ հավանում եմ»,- ասաց Շուշաննան: Դերասանուհու համոզմամբ՝ եթե մարդ պարբերաբար բողոքում է գիրությունից կամ նիհար լինելուց, նշանակում է՝ բարդութավորված է և պետք է դիմի հոգեբանի օգնությանը: «Մեկ-մեկ էլ այնքան եմ հոգնում նկարահանումներից, որ ասում եմ՝ այլևս չեմ ցանկանում նկարահանվել սերիալում, բայց ինքս էլ հասկանում եմ, որ չեմ կարող չզբաղվել սիրածս գործով»,- ասաց նա:

Սոնա Շահգելդյան
Նախորդ տարի միաժամանակ երկու տարբեր մրցանակաբաշխություններում «Տարվա լավագույն» երգչուհի ճանաչված Սոնա Շահգելդյանը նշում է, որ երբեք չի նեղվել իր գիրությունից: Նրա կարծիքով՝ ինքը բացարձակ գեր չէ. եթե հասկանա, որ գեր է, կնիհարի: «Կարծում եմ՝ ոչ մի կապ չունի՝ մարդը գե՞ր է, թե՞ նիհար. կարևորը էներգիան է: Շատ թմբլիկ սևամորթներ կան, ովքեր այնքան լավ էներգիա ունեն և այնքան լավ են բեմում հանդես գալիս, որ նույնիսկ հիանալի կազմվածք ունեցողները չեն կարող այդպես ներկայանալ»,- ասաց երգչուհին: Կերպարն իր «ֆիշկան» համարող Սոնան նշեց նաև, որ «Նոր ալիքից» առաջ ինքն իրեն լավ զգալու համար նիհարել է 8-10 կգ.«Պարբերաբար լողի, պարի եմ գնում. հետևում եմ կառուցվածքիս,- հայտնեց երգչուհին և շարունակեց,- պետք չէ չափազանցնել, քանի որ հանդիսատեսը ոչ թե տեսքին է նայում, այլ երգին ու կատարմանը»: 

 Նյութը՝ esyes.am-ի