«168 ժամ». Ադրբեջանում կարծում են, որ առայժմ պատրաստ չեն պատերազմի

«Այն, որ դեռևս պատերազմ չի սկսվել, դա ոչ թե Հայաստանի, Ադրբեջանի, Մինսկի խմբի, ռուսների կամ ամերիկացիների շնորհիվ է, այլ երևի կապված է այն հանգամանքի հետ, որ Ադրբեջանում կարծում են, որ առայժմ պատրաստ չեն պատերազմի: Երբ նրանք վստահ եղան իրենց ուժերի վրա՝ սկսելու են պատերազմական գործողություններ, պատերազմը կսկսվի Ադրբեջանի կողմից»,- «168 ժամ»-ի թղթակցի հետ զրույցում խոսելով ղարաբաղյան հիմնահարցի մասին՝ ասել է Ռուսաստանի Գիտությունների ակադեմիայի Արևելագիտության ինստիտուտի գիտաշխատող Ալեքսանդր Սկակովը:

Վերջինս գտնում է, որ հարձակվելու դեպքում՝ Ադրբեջանը Ղարաբաղի նկատմամբ հնարավոր ագրեսիան մատուցելու է՝ որպես իր ներքին խնդիր: «Ադրբեջանը չի հարձակվելու Հայաստանի վրա, Ադրբեջանը հարձակվելու է սեփական Լեռնային Ղարաբաղի վրա: Ստացվում է, որ Հայաստանը, չճանաչելով ԼՂՀ-ի անկախությունը, դրանով իսկ ճանաչում է Ադրբեջանի տարածքային ամբողջականությունը: Դե յուրե այդպես է ստացվում»,- նշել է ռուս փորձագետը: Հարցին՝ ստացվում է, որ Հայաստանը պետք է ճանաչի՞ ԼՂՀ-ի անկախությունը, Ալ.Սկակովը պատասխանել է. «Կարծում եմ՝ այո: Իմ կարծիքով՝ բոլոր պատճառաբանությունները, թե ԼՂՀ-ի անկախության ճանաչումը հարված կլինի խաղաղության գործընթացին, չեն աշխատում, դա երեսպաշտություն է, որովհետև չկա ոչ մի խաղաղության գործընթաց: Դու չես կարող խաթարել այն, ինչ գոյություն չունի: ԼՂՀ-ի ճանաչումը կլինի երաշխիք, որպեսզի դուք կարողանաք միջամտել այդ հակամարտությանը, հակառակ դեպքում՝ Բաքուն դա կներկայացնի որպես Ադրբեջանի ներքին հարց»: