Սիրիացի հայ փախստականների համար բացվել են ռուսերենի դասընթացներ

Հումանիտար օգնության և արտասահմանում հայրենակիցների կապերի Ռուսաստանի կառավարության ծառայությունը (Россотрудничество) Հայաստանում ռուսերեն լեզվի դասընթացներ է սկսել Սիրիայից հայ փախստականների համար: Այս մասին տեղեկացնում է BBC լրատվական գործակալությունը:

Դեռևս ձևավորվել է ընդամենը մեկ խումբ, ինը հոգուց բաղկացած, սակայն կազմակերպությունը պլանավորում է բացել նոր խմբեր: Ինչպես տեղեկացնում է կազմակերպության մամլո խոսնակը, դասընթացները անց են կացվում օտար քաղաքացիների համար նախատեսված հատուկ ծրագրով:

Դասընթացները նախատեսված են սիրիահայերի համար, որոնք Սիրիայում ընթացող պատերազմի պատճառով ստիպված են եղել լքել իրենց տները: Սիրիայի հայկական համայնքում մինչ պատերազմի սկիզբը ապրում էր շուրջ 80 հազար մարդ: Վիճակի լարվելուց հետո շատերը տեղափոխվել են հարևան Լիբանան, ուր ապրում է շուրջ 165 հազար հայ: Սիրիայից փախստականների թիվը Հայաստանում հասնում է 6000-ի, որոնց մեծ մասը ծագումով հայ են: