ԱԳՆ շենքի աճուրդը տեղի կունենա մարտի սկզբին

Կառավարության թիվ երկու մասնաշենքի աճուրդը տեղի կունենա մարտի առաջին տասնօրյակում: Այս մասին լրագրողների հետ հանդիպման ժամանակ այսօր ասել է ՀՀ կառավարությանն առընթեր պետգույքի կառավարման վարչության պետ Արման Սահակյանը:

Կառավարության թիվ 2 մասնաշենքում են տեղաբաշխված արտաքին գործերի, էներգետիկայի և բնական պաշարների, տարածքային կառավարման նախարարությունները:

Հիշեցնենք, որ 2012-ին ՀՀ կառավարությունը որոշում էր ընդունել ԱԳՆ շենքը 51.2 մլն դոլարով վաճառել արգենտինահայ գործարար Էդուարդո Էռնեկյանին պատկանող «Տանգո» ընկերությանը, սակայն դեկտեմբերին որոշում կայացվեց շենքը վաճառել աճուրդով: