Վճարովի եթերաժամի ամենաբարձր սակագինը «Շանթ»-ինն է

Հայաստանի երկու տասնյակ հեռուստաընկերությունների կողմից Հանրապետության Նախագահի փետրվարի 18-ի ընտրություններին գրանցված թեկնածուներին նախընտրական քարոզչության ժամանակահատվածում տրամադրվող վճարովի եթերաժամի ամենաբարձր սակագինը սահմանել է «Շանթ»-ը՝ 1 րոպեի համար 120 հազար դրամ, ներառյալ ԱԱՀ-ն: Այս մասին հայտնում է «Փաստինֆո» գործակալությունը:

Հունվարի 21-ից մինչև փետրվարի 16-ն այս հեռուստաընկերությունը յուրաքանչյուր օր ժամը 18-ից 19-ը պատրաստ է եթեր տրամադրել նախագահի թեկնածուներին: Ընդ որում, յուրաքանչյուր թեկնածուին նախընտրական քարոզչության համար տրամադրվող մեկ օրվա առավելագույն ժամանակը սահմանված է 7 րոպե:

ԿԸՀ պաշտոնական կայքէջում տեղադրված նախընտրական քարոզչության ժամանակահատվածում նախընտրական քարոզչության համար տրամադրվող վճարովի եթերաժամի սակագներից պարզ է դառնում, որ մայրաքաղաքում գործող հեռուստաընկերություններից ամենացածր սակագինն առաջարկում է «Երևան»-ը՝ 1 րոպեի համար 15 հազար դրամ: Քարոզարշավի յուրաքանչյուր օր նախընտրական քարոզչության համար կհատկացվի ժամը 20.30-ից մինչև 21-ն ընկած ժամանակահատվածը: Յուրաքանչյուր թեկնածուին մեկ օրվա ընթացքում կտրամադրվի առավելագույնը 10 րոպե ժամանակ:

Մնացած հեռուստաընկերությունները 1 րոպեի համար սահմանել են հետևյալ սակագները. «Արմենիա»՝ 110 հազար դրամ, Հայաստանի հանրային հեռուստաընկերությունը՝ 80 հազար դրամ, «Հայկական երկրորդ հեռուստաալիք»-ը՝ երեկոյան ժամերին և կիրակի օրերին՝ 60 հազար դրամ, իսկ մյուս ժամերին՝ 30 հազար դրամ, «Կենտրոն»-ը՝ 32 հազար 400 դրամ «Երկիր Մեդիա»-ն՝ 30 հազար դրամ, «Ա-ԹիՎի»-ն՝ 24 հազար դրամ, «Ար»-ը՝ 20 հազար դրամ, «ԱրմՆյուզ»-ը՝ 18 հազար դրամ:

Մարզային հեռուստաընկերություններից ամենաբարձր սակագինն առաջարկում է Գյուրիի «Շանթ»-ը՝ 15 հազար դրամ, իսկ ամենացածրը՝ Ալավերդիում գործող «Անկյուն+3»-ը՝ ժամը 16.30-ից 18-ը 1 րոպեի համար 1 300 դրամ, ժամը 18.30-ից 23-ը՝ 1 750 դրամ:

Գործող ռադիոընկերություններից նախընտրական քարոզչության համար վճարովի եթերաժամ կտրամադրեն միայն երեքը՝ Հայաստանի Հանրային ռադիոընկերությունը, «Ռադիո 107 FM»-ը և «Շանթ»-ը: Վերջին երկուսի սփռման տարածքը համապատասխանաբար Երևանն ու Գյումրին են:

Հայաստանի Հանրային ռադիոընկերությունը պատրաստ է վճարովի եթերաժամ տրամադրել առանց ժամանակային սահմանափակումների՝ 1 րոպեի համար 3 600 դրամ սակագնով:

«Ռադիո 107 FM»-ը նախընտրական քարոզչության համար կտրամադրի ժամը 19.00-ից մինչև 21-ն ընկած ժամանակահատվածը՝ յուրաքանչյուր թեկնածուին մեկ օրվա ընթացքում առավելագույնը 7 րոպե ժամանակ:

«Շանթ» ռադիոընկերությունը վճարովի եթերաժամ կտրամադրի ժամը 14.00-ից մինչև 16-ն ընկած ժամանակահատվածում՝ յուրաքանչյուր թեկնածուին մեկ օրվա ընթացքում առավելագույնը 14 րոպե ժամանակ: