«Իմ կյանքը քո մուշտակից թանկ է»

Հայկական շոու-բիզնես. մորթե մուշտակը անբաժանելի ատրիբուտ է: Ձմռանը բնական մորթե մուշտակով կարելի է հանդիպել նաև հայ հայտնիների, որոնց համար թանկարժեք մուշտակն ուղղակի անփոխարինելի է: Հայ աստղերից շատերը տանը կենդանի են պահում, բայց մյուս կողմից՝ խելագարվում են բնական մորթուց կարված մուշտակների համար. բա որ մի օր էլ ձեր կենդանիները մորթազերծման ենթարկվեն, ինչպես, օրինակ, այդ վտանգն առկա էր «101 դալմատիններ» ֆիլմում…

Արմինկա- Շատ եմ սիրում մորթե և կաշվե հագուստ, միաժամանակ դեմ եմ կենդանիներին «սպանելուն»: Հիմա բնական մորթուց կարված հագուստ չեմ հագնում, հատկապես, երբ իմացա, որ դրանք ալերգիկ ֆոն են առաջացնում, ու քանի որ ես էլ բրոնխների հետ կապված խնդիրներ ունեմ, բժիշկները խորհուրդ տվեցին հրաժարվել դրանցից: Հիմա ավելի շատ կաշվե հագուստ, պայուսակներ ու այլ պարագաներ եմ գնում, նաև աշխատում եմ գնել բաճկոններ, որոնք մորթե դետալներով են:

Շպռօտ- Մուշտակներ ունեմ, բայց դրանք արհեստական են, միայն բնական մորթուց կարված մի մուշտակ ունեմ, որը ինձ հիշատակ է մնացել մորաքրոջիցս, ինչը միայն տեսահոլովակներից մեկում եմ հագել. այն շատ տաք էր: Ասեմ, որ դեմ եմ կենդանիներին սպանելուն և անգամ միս չեմ ուտում:

Նունե Եսայան- Ես հագնում եմ բնական մորթուց կարված մուշտակ՝ չնայած շատ չունեմ: Եթե հանդիպում է գեղեցիկ գույնի, լավ որակի բնական մորթուց կարված հագուստ կամ ատրիբուտ, գնում եմ: Դեմ եմ կենդանիների նկատմամբ ընդհանրապես բոլոր տեսակի վայրենություններին՝ չնայած մենք նաև սնվում ենք կենդանական սնունդով, ինչի համար ևս կենդանիներ են սպանում:

Լիլիթ Հովհաննիսյան- Շատ եմ սիրում մորթիներ, ու դա իմ թուլությունն է: Ես կողմ եմ կենդանիների սպանդը մերժող աշխարհում լայն թափ ստացած շարժամանը, բայց ինչ արած, երբ տեսնում եմ՝ գնում եմ: Նապաստակի մորթուց կարված մուշտակ եմ հագնում, ունեմ գլխարկներ, օձիքներ: Արհեստական մորթի արտադրողներին կոչ եմ անում դրանք որակյալ արտադրեն, քանի որ դրանք շուտ են կորցնում գույնը կամ որակը: Մեղավոր եմ զգում ինձ, որ հագնում եմ, խոսք եմ տալիս, որ այլևս չեմ հագնի բնական մորթուց կարված մուշտակ:

Նելլի- Ես էլ եմ հագնում, բայց դեմ եմ կենդանիներին սպանելուն ու, ընդհանրապես, վատ վերաբերվելուն: Մի անգամ փողոցով անցնում էի, մի տղա աքացի տվեց շանը, ես ինձ կորցրեցի, հաշվի չառա, որ փողոցում եմ, ձայնս գլուխս գցեցի ու այդ տղային, ինչ ասես ասացի. «Քեզ դուր կգա՞, որ քեզ այդպես հարվածեն»: Չմոռանանք նաև, որ մենք ևս սնվում ենք կենդանական սնունդով, ինչի համար շատ կովեր, հավիկներ, խոզեր են մորթվում… Խոստանում եմ էլ բնական մորթուց մուշտակ չեմ հագնի:

Մարիաննա Հովհաննիսյան- Ես չեմ հագնում բնական մորթուց կարված մուշտակ՝ չնայած ոչ սկզբունքորեն, ուղղակի այդպիսի ցանկություն չունեմ: Բնականի նկատմամբ պահանջարկից ելնելով՝ շատ կենդանիներ են սպանվում, ինչը վատ է: Անկախ ամեն ինչից՝ կարելի է կանխել կամ նվազեցնել կենդանիների որսը: Մարդիկ կան, որ մեծ կարողություն ունեն ու ամեն պահի գնում են որսի, գամ իրենց գումարները թանկարժեք մորթիների վրա են ծախսում:

Նյութը՝ esyes.am-ի