Գենետիկոսները կապ են գտել Ավստրալիայի բնիկների և Հնդկաստանի միջև

Գերմանացի գենետիկոսները պարզել են, որ Ավստրալիայի բնիկների որոշ խմբեր մոտ 4 հազ. տարի առաջ ժամանակակից Հնդկաստանի տարածքից տեղի ունեցած միգրացիայի որոշակի ազդեցությունն են կրել: Աշխատանքը հրապարակվել է Proceedings of the National Academy of Sciences պարբերականում, որի համառոտ բովանդակությունը ներկայացնում է NatureNews-ը:

Ուսումնասիրության արդյունքում հետազոտության հեղինակներն անց են կացրել 334 մարդու՝ Հյուսիսային տերիտորիաների բնիկների, Պապուա Նոր Գվիենայի բնակիչների, մամանվա լեզվի կրողների և Հարավ-Արևելյան Ասիայի որոշ պոպուլյացիաների ներկայացուցիչների գենային վերլուծություն: Այն ցույց է տվել, որ առաջին երեք խմբերի բաժանումը տեղի է ունեցել գրեթե միաժամանակ՝ մոտ 36 հազար տարի առաջ, ինչը ճշգրիտ համաձայնության մեջ է Ավստրալիայի բնակեցման արդի տեսությունների հետ: Վերլուծությունը, սակայն, Հյուսիսային տերիտորիաների բնիկների գեներում հայտնաբերել է այնպիսի գենետիկ դրոշմներ (մարկերներ), որոնք հատուկ են մայրցամաքային Ասիայի բնակիչների համար: Դրանք բացակայել են Պապուա Նոր Գվինեայի և մամանվա ժողովրդի մոտ, ինչը հետազոտության հեղինակների կարծիքով խոսում է հօգուտ 4,230 տարի առաջ Ասիայից դեպի Ավստրալիա միգրացիայի առկայության:

Բացի գենետիկ վերլուծության արդյունքներից, գիտնականների վարկածը կարծես հաստատվում է նաև միանման քարե գործիքների և դինգո ցեղի շների հնագիտական գրեթե համաժամանակյա վկայվածությամբ:

Հարցված մասնագետները մատնանշնում են այն, որ գենետիկ այս վերլուծությունը վերաբերում է Ավստրալիայի բնիկների միայն մեկ խմբին: Իրենց կարծիքով՝ դեպի մայրցամաք միգրացիաների լիակատար պատկերի վերականգնման համար անհրաժեշտ են հավելյալ ուսումնասիրություններ, որոնք, ինչպես նշվում է հրապարակման մեջ, բավականին դժվար է անելը բնիկների չվստահող վերաբերմունքի պատճառով: