Գտնվել է խոշորագույն պարուրաձև գալակտիկան

Աստղագետները պարզել են, որ Սիրամարգի համաստեղության NGC 6872 խոշոր պարուրաձև գալակտիկան իրականում անհամեմատ ավելի մեծ է, քան առաջ կարծում էին, և խոշորագույնն է հայտնի պարուրաձև գալակտիկաների շարքում: Այս հայտնագործության մասին զեկույցը ներկայացվել է Ամերիկյան աստղագիտական ընկերության գիտաժողովին: Համառոտ բովանդակությունը բերված է NASA-ի կայքում: Հետազոտությունը հնարավոր է դարձել իրականացնել ուլտրամանուշակագույն տիրույթում GALEX ուղեծրային դիտակով կատարված դիտումների շնորհիվ:

Հեղինակները հաջողել են NGC 6872 գալակտիկայի ճյուղերից մեկում նկատել որոշակի կոմպակտ տիրույթ, որը ենթադրաբար դրա արբանյակ գալակտիկան է: Վերջինիս առկայությունն ընդլայնում է առանց այդ էլ ոչ փոքր այս աստղային համակարգի չափսերը և դարձնում այն մինչ այժմ հայտնիներից ամենամեծը: Գալակտիկայի ընդհանուր ձգվածությունը 522 հազար լուսատարի է, ինչը 5 անգամ գերազանցում է մեր գալակտիկայի՝ Ծիր Կաթնի տրամագիծը:

Այն, որ կոմպակտ գալակտիկա-արբանյակը հնարավոր է եղել դիտարկել միայն ուլտրամանուշակագույն տիրույթում, խոսում է դրա կազմում գտնվող աստղերի երիտասարդ տարիքի մասին: Գիտնականները կարծում են, որ դրանք կազմավորվել են ոչ ավելի վաղ, քան 200 հազար տարի առաջ, երբ NGC 6872 պարուրաձև գալակտիկան հատելով անցել է ավելի փոքր չափսի իր արբանյակը: Հրապարակված լուսանկարում վերջինս կարելի է տեսնել NGC 6872 հսկայի կենտրոնի մերջակայքում:

Աստղագետների արդի պատկերացումների համաձայն, գալակտիկաների բախումները դրանց պարբերական նորացման հիմնական միջոցն են: Դրանք առաջ են բերում միջաստղային նյութի վերադասավորություններ, որոնք իրենց հերթին խթանում են նոր աստղերի առաջացումը: