Մոլորակի տաքացման մեղավորը մուրն է

Գիտնականների միջազգային խումբը հրապարակել է մի զեկույց, որի համաձայն մրի ազդեցությունը Երկրագնդի կլիմայի վրա կարող է շատ ավելի նշանակալի լինել, քան մինչ այժմ կարծում էին: Հոդվածը հրապարակվել է Journal of Geophysical Research-Atmospheres պարբերականում, որի համառոտ բովանդակությանը կարելի է ծանոթանալ ScienceNow կայքում:

31 մասնագետից 4 տարի անընդմեջ հետազոտություն պահաջած այս զեկույցն ամփոփում է Երկրագնդի էներգետիկ բալանսի վրա մրի ազդեցության վերաբերյալ առկա ուսումնասիրությունները:

Հեղինակների տվյալներով՝ մթնոլորտ արտանետված մուրը կարող է կլիմայի վրա ազդեցության երկրորդ կարևորագույն գործոնը լինել ածխաթթու գազից հետո: Գիտնականների խոսքով՝ մթնոլորտում պարունակվող ածխի՝ 100 նանոմետրը գերազանցող պինդ մասնիկները կլանում են 1.1 Վտ/մ² արեգակնային էներգիա: Այս ցուցանիշը երկու անգամ ավելին է, քան մինչ այժմ ենթադրվում էր:

Մրի մարդածին աղբյուրներից առաջնայինները դիզելային շարժիչներն են և աշխարհի թույլ զարգացած երկրներում հնացած տեխնոլոգիաներով ածուխի այրումը: Հետաքրքրական է, որ վերջին դեպքում տեղի է ունենում ոչ միայն մրի, այլև ծծմբային միացությունների արտանետում, որոնք իրենց անդրադաձային հատկությունների պատճառով պակասեցնում են մոլորակի տաքացման ցուցիչը: Վերջերս կլիմայագետների մեկ այլ խումբ վերանայել է երաշտների մոլորակային դինամիկան, որն այդքան էլ շեշտակի չէ, որքան կարծում էին: