«Ժողովուրդ». Հանրապետական երիտասարդները Սերոբ Բոզոյանին գումար են փոխանցել

Հայտնի «փուչիկների գործով» մեղադրյալ Սերոբ Բոզոյանը դեկտեմբերի 26-ին Ֆանարջյանի անվան ուռուցքաբանության կենտրոնից դուրս է գրվել: Նա «Ժողովուրդ»-ի հետ զրույցում ասաց, որ ինքը հիվանդանոցում ծրարով գումար է ստացել:

«Իմ վիրահատության համար, ինչպես նաև դեղորայք գնելու համար հանրապետական երիտասարդներն ինձ այցելեցին և գումար տվեցին, որ ես հոգամ իմ ծախսերը»,- ասաց Բոզոյանը՝ հավելելով, որ իր առողջական վիճակը գնալով լավանում է, և գործով վերանշանակված հաջորդ դատական նիստը տեղի կունենա հունվարի 22-ին՝ ժ. 12-ին:

Հիշեցնենք, որ մայիսի 4-ին՝ ՀՀԿ նախընտրական հանդիպման ժամանակ, Հանրապետության հրապարակում գազալիցքավորված փուչիկների պայթյունի հետևանքով այրվածքներ ստացան և տարբեր բուժհաստատություններ տեղափոխվեցին 154 անձինք: Փաստի առթիվ հարուցվեց քրեական գործ, և փուչիկները լիցքավորած Բոզոյանին Երևանի Կենտրոն և Նորք-Մարաշ վարչական շրջանների ընդհանուր իրավասության դատարանը դատապարտեց 1 տարվա ազատազրկման: