«168 ժամ». Վրաց ժողովուրդը ձգտում է իր գերակայությունը հաստատել և իր մեջ ձուլել մնացած բոլոր ժողովուրդներին

«Եթե առողջ դատենք, Կարս-Ախալքալաք երկաթուղին իրականում կործանարար է և Հայաստանի, և նույն Վրաստանի համար»,- «168 ժամ»-ի թղթակցի հետ զրույցում ասել է «Միտք» վերլուծական կենտրոնի փորձագետ Վահե Սարգսյանը, ով երկար տարիներ զբաղվում է Ջավախքի հիմնախնդրով և ջավախահայության հարցերով: Իսկ անդրադառնալով վերջերս հայկական մամուլում հնչած այն տեսակետին, թե Իվանիշվիլին ավելի հայամետ գործիչ է լինելու, Վ.Սարգսյանը նշել է, որ նման հայտարարություններն այնքան էլ լուրջ չեն:

«Մենք Վրաստանի ցանկացած իշխանություն պետք է դիտարկենք Վրաստանի անցյալի խորքային իրողությունների մեջ, պետք է լրջագույնս հասկանանք Վրաստանի պատմական անցյալը, որտեղ տեղի են ունեցել և մինչև հիմա շարունակվում են էթնոկազմավորման գործընթացներ: Սրանով է դրսևորվում երկրում ապրող ժողովուրդների նկատմամբ Վրաստանի քաղաքականությունը: Այսօր այդ գործընթացը չի ավարտվել, և Վրաստանը տանում է էթնոկրատիզմի քաղաքականություն, այսինքն՝ բուն վրացական՝ քարթվելական ժողովուրդը ձգտում է իր գերակայությունը հաստատել և ավելին՝ իր մեջ ձուլել մնացած բոլոր ժողովուրդներին»,- նշել է փորձագետը:

Ըստ նրա՝ լավատեսություն չի ներշնչում նաև այն հանգամանքը, որ Իվանիշվիլին շատ սերտորեն կապված է երկրի հոգևոր իշխանությունների՝ կոնկրետ վրաց պատրիարք Իլյա Երկրորդի հետ, ով այդ ձուլման, այլ ժողովուրդների մշակույթների յուրացման քաղաքականության գլխավոր ճարտարապետներից մեկն է:

«Այս ամենով եզրակացնենք. Իվանիշվիլին լինելու է միայն ու միայն վրացամետ»,- ասել է Վ.Սարգսյանը: