«ՀԺ». Նրանց երիկամը կարող է չաշխատել

Երիկամի փոխպատվաստում արած քաղաքացիները նախորդ տարվա դեկտեմբերից մինչև այժմ՝ ամբողջ մեկուկես ամիս, չեն ստացել իրենց հասանելիք դեղորայքը, որը ստանում են պետպատվերով: Հայաստանում հաշվառված այդ մարդկանց թիվը շուրջ 90-ն է: Առկա խնդրի մասին երեկ թերթի հետ զրույցում ահազանգում էր «Դանկո» բարեգործական հիմնադրամի նախագահ Իվետա Էպոյանը. «Արդեն 2-3 տարի է՝ դեղորայքը, որը պետպատվերով պետք է հիվանդը ստանա, պարբերաբար ուշացնում են մեկ ամիս, ամիսուկես, 15-20 օր: Եվ ոչ մի բացատրություն չեն տալիս»: Նրա խոսքով՝ նշված հիվանդներին պետությունը հիմնականում տրամադրում է «Ցիկլոսպորին» կոչվող դեղը: Նույն նպատակին ծառայող դեղը, երբեմն նաև այլ անվանում է ունենում՝ կախված այն բանից, թե որ երկրի արտադրանք է: Ու քանի որ վերը նշված խմբի մարդկանց օրգանիզմում օտար մարմին է՝ երիկամ, համապատասխան դեղերն անհրաժեշտ են, որպեսզի նրանց դիմադրողականությունը նվազի և օրգանիզմը չպայքարի օտար այդ մարմնի դեմ՝ թույլ տալով դրան արդյունավետ գործել: «Իսկ եթե այդ դեղը դոզայով պակասում է կամ չեն խմում մի քանի օր, փաստորեն, արդեն ռիսկ կա, որ փոխպատվաստված օրգանն այլևս չի աշխատի: Դա կարևոր դեղ է, որը մեր հիվանդները չեն կարող գնել»,- շարունակեց բարեգործական հիմնադրամի նախագահը:

Թերթը զրուցել է նաև «Արաբկիր» բժշկական կենտրոնի հեմոդիալիզի, երիկամի փոխպատվաստման բաժանմունքի պատասխանատու բժիշկ Հելեն Նազարյանի հետ: Փոխպատվաստած երիկամով հիվանդները հենց այս բուժկենտրոնում են հաշվառված՝ գտնվելով մասնագետների պարբերական հսկողության տակ: Խոսելով այն մասին, թե հիվանդների մոտ ինչ բացասական հետևանքների կարող է հանգեցնել համապատասխան դեղի բացակայությունը, բժշկուհին ասաց. «Խնդիրները մի քիչ տարբեր են՝ կախված ժամանակից, թե երբ է փոխպատվաստվում արվել: Ինչքան քիչ է անցել երիկամի փոխպատվաստումից, այնքան երիկամը ավելի զգայուն է, և կարող է, նույնիսկ մեկ օր դեղ չընդունելը լուրջ խնդիրների հանգեցնել: Իսկ այն մարդկանց մոտ, որոնք ավելի վաղ են երիկամի փոխպատվաստում արել, խնդիրներ կարող են առաջանալ 2-3 օր դեղ չընդունելու դեպքում»:

ՀՀ առողջապահության նախարարության աշխատակազմի ղեկավար Սուրեն Քրմոյանը թերթի հետ զրույցում նշել է, որ նախորդ տարեվերջին «Ցիկլոսպորին»-ի մատակարարման հետ կապված խնդիր է առաջացել և որոշակիորեն ձգձգվել է հիվանդների դեղի տրամադրումը: Պակասն, ըստ նրա, փորձել են լրացնել այլ աղբյուրներից: Քրմոյանը վստահեցրել է, որ առաջիկա 2-3 օրերի ընթացքում դեղերը կհասնեն իրենց հասցեատերերին: