Տեր-Պետրոսյանը վերադարձավ իր հաղթական պատվանդանին. Գալուստ Սահակյան

«Չէի ուզի, որ Լևոն Տեր-Պետրոսյանն իր քաղաքական մայրամուտն ապրեր, որովհետեւ վերջին հաշվով անցքերին նա ամենաքաջատեղյակ անձերից մեկն է, և երկրորդը՝ մեր առաջին նախագահն է: Ես միշտ ասում եմ՝ մարդու աստեղային ժամանակը մեկ անգամ է լինում: Ինքը իր պատվանդանից պիտի չիջներ»,- այսօր «Առավոտ»-ի հետ զրույցում ՀԱԿ առաջնորդ Լևոն Տեր-Պետրոսյանի մասին այսպիսի տեսակետ հայտնեց ՀՀԿ խմբակցության ղեկավար Գալուստ Սահակյանը:

Նա վստահ է, որ եթե Լևոն Տեր-Պետրոսյանն իր պատվանդանից չիջներ, երկիրն ավելի հզոր կլիներ և հզոր կլինեին նաև հիշողությունները իր մասին. «Իսկ հիմա նա նորից վերադարձավ իր հաղթական պատվանդանին, ինչը չի նշանակում, որ նա քաղաքականությունից դուրս է գալու»:

Մեր հարցին՝ իսկ Սերժ Սարգսյանի աստեղային ժամանակը ե՞րբ է, հիմա՞, Գալուստ Սահակյանը պատասխանեց. «Իմ բնութագիրս դրան չէր վերաբերվում: Ես ուզում էի ասել, որ նախագահ Լևոն Տեր-Պետրոսյանը երբ հեռացավ, իր բարձունքում պիտի մնար: Քաղաքական դաշտից ով հեռանում է, չի եղել պատմության մեջ, որ նորից հեռանա: Մեկ անգամ շփոթեց Նապոլեոնը եկավ հաղթեց, էն էլ մի քանի ամիս տևեց կյանքը»:

Մեր դիտարկմանը, որ փաստորեն այդ տրամաբանությամբ Ռոբերտ Քոչարյանն էլ չպիտի վերադառնա, նա պատասխանեց. «Չգիտեմ, դու բաժանի նրանց որտեղ ուզում ես»: