Իվանիշվիլին նյարդայնացավ

«Վրաստանի ԱԳ նախարար Մայա Փանջիկիձեի պարզաբանումից հետո կարելի է ասել , որ այդ հարցն արդեն սպառված է»,-այսօր ՀՀ վարչապետ Տիգրան Սարգսյանի եւ Վրաստանի վարչապետ Բիձինա Իվանիշվիլու համատեղ ասուլիսի ժամանակ՝ անդրադառնալով ԼՂ հիմնախնդրի վերաբերյալ Վրաստանի ԱԳ նախարար Մայա Փանջիկիձեի՝ Լիտվայի խորհրդարանում արած հայտարարություններին,ասել է Վրաստանի վարչապետ Բիձինա Իվանիշվիլին:

Նշենք, որ Փանջիկիձեի հայտարարությունների մասին վրացական «Ռուսթավի 2» հեռուստաընկերության հարցն ակնհայտորեն դուր չեկավ Վրաստանի վարչապետին: Բիձինա Իվանիշվիլին դիմելով վրացի լրագրողին, ասաց.«Ամեն ինչ պարզ է, մանավանդ Ձեր հեռուստաընկերությունն արդեն խոսել է այդ մասին: Նշվել է, որ հարցը աղավաղված է, եւ Դուք նորից բարձրացնում եք այդ հարցը: Ամենամեծ ակտիվությունը ցույց տվեց հենց Ռուսթավի հ/ը»:

Վրաստանի վարչապետը հավելեց, թե այս հարցում ամենամեծ ակտիվությունը ցուցաբերեց հենց այս հեռուստաընկերությունը եւ այսօր հետաքրքիր է, որ նույն հեռուստաընկերությունը այդ հարցն է հնչեցնում.«Ինձ համար հետաքրքիր է, թե ինչու այդ հարցը տրվեց այստեղ»:

Հարցին արձագանքեց նաեւ ՀՀ վարչապետ Տիգրան Սարգսյանը: Նա նախ շնորհակալություն հայտնեց Վրաստանի վարչապետին' ԼՂ հակամարտության հարցում հավասարակշռված դիրքորոշում ունենալու համար եւ նշեց.«Հատկապես ուզում եմ նշել, գաղտնիք չէ, որ շատ հաճախ ԼՂՀ հարցի կարգավորման շուրջ արվող հայտարարությոններն աղավաղվում են: Մենք շնորհակալ ենք մեր վրացի գործընկերներին, որ նրանք այդպիսի աղավաղումների դեպքում օպերատիվ արձագանքեցին, որպեսզի չլինեն այնպիսի մեկնաբանություններ, որոնք չեն համապատասխանում Վրաստանի կառավարության դիրքորոշմանը»:

Տիգրան Սարգսյանի այս հայտարարությունից հետո Բիձինա Իվանիշվիլին նշեց, որ Ադրբեջան կատարած այցելության ընթացքում հանդիպել է Ադրբեջանի նախագահ Իլհամ Ալիեւի հետ եւ քննարկել խնդիրը:

«Մենք խոսել ենք այդ հարցի շուրջ: Ալիեւի դիրքորոշումը ես փոխանցեցի Տիգրան Սարգսյանին, հարցը քննարկեցի նաեւ վարչապետի հետ: Ես մանրամասնորեն չեմ ուզում խոսել այդ հարցի մասին, ուզում եմ ասել, որ հարցն իրոք շատ ծանր է եւ ինչպես երեւում է, մոտ ապագայում շատ ծանր է լինելու այդ հարցի որոշումը: Իմ ցանկությունն ու կոչն է, որ հարցն անպայման կարգավորվի խաղաղ ճանապարհով: Ես ուզում եմ, որ երկու պետությունները բոլոր հնարավորությունները ներդնեն հարցի խաղաղ կարգավորման համար»: Գրում է Հենարան.am-ում:

Հիշեցնենք, որ ադրբեջանական լրատվամիջոցների փոխանցմամբ, Լիտվայի խորհրդարանում արած հայտարարության մեջ Մայա Փանջիկիձեն նշել էր, որ "ղարաբաղյան հակամարտությունը պետք է կարգավորվի Ադրբեջանի տարածքային ամբողջականության սահմաններում": Ըստ վրացական ԶԼՄ-ների այս հայտարարության համար Վրաստանի արտգործնախարարն արժանացել է վարչապետի նկատողությանը, ինչին հաջորդել է Փանջիկիձեի պարզաբանումը, որտեղ վերջինս նշում է, թե հայտարարության մեջ ասել է, որ հարգում է Ադրբեջանի տարածքային ամբողջականությունը' առանց այն կապելու Լեռնային Ղարաբաղի հետ:

Հիշեցնենք, որ Վրաստանի վարչապետ Բիձինա Իվանիշվիլու գլխավորած պատվիրակությունը Հայաստան է ժամանել այսօր' դեկտեմբերի 17-ին: