Վիրաբույժները հայտնաբերել են սոսինձ, որով հնարավոր է միացնել ոսկորները

Կոտրված ոտքերը և ձեռքերը հնարավոր կլինի սոսնձել: Թագավորական տեխնոլոգիական համալսարանի շվեդ գիտնականները հեղափոխություն են կատարել վիրահատության բնագավառում: Այս մասին հաղորդում է ИТАР-ТАСС գործակալությունը:

Շուրջ 14 տարի նրանք աշխատում էին ունիկալ սոսնձի հայտնաբերման ուղղությամբ: Սոսինձը քսում են կոտրված վայրին և հալոգեն լամպի օգնությամբ ամրացնում: Իսկ երբ ոսկորները միանում են իրար, սոսինձը ներծծվում է օրգանիզմի մեջ: Այսպիսով, ամենաբարդ կոտրվածքները, այդ թվում՝ ողնաշարի և գանգի կոտրվածքները, հնարավոր կլինի բուժել առանց տեղային կոնստրուկցիաների ներդրման և առանց տեղային թմրեցման:

Նոր մեթոդը հնարավորություն կտա կրճատել ոչ միայն վիրահատության ժամանակը, այլ նաև հետվերականգնողական գործընթացը: Եթե առաջ վերականգման համար անհրաժեշտ էր շուրջ երեք ամիս, ապա այժմ նման «սոսնձումից» երեք օր անց հինանդը կարող է դուրս գալ աշխատանքի:

Երբ սոսինձն անցնի տոքսիկայնության ստուգում, այն կսկսեն փորձարկել կենդանիների վրա: Գիտնականները վստահ են, որ եթե ամեն բան հաջող ընթանա, նմանատիպ վիրահատություններ կարելի է սկսել արդեն այս տարի: