Առաջարկվում են կարգավորումներ, որոնք հնարավորություն կտան ՀՀ-ին ներգրավել միջազգային գնահատման շուկայում

Նախագծի ընդունումը միտված է Հայաստանի Հանրապետությունում գնահատման գործունեության զարգացմանը՝ այն դարձնելով առավել մրցունակ, թափանցիկ և միջազգային չափանիշներին համապատասխանող: Առաջարկվող կարգավորումները հնարավորություն կտան Հայաստանի Հանրապետությանը ներգրավվել միջազգային գնահատման շուկայում և ստեղծել այնպիսի համակարգ, որն ապահովում է բարձր որակի, վստահելի և ներդրումներին նպաստող ծառայությունների մատուցում:

Տնտեսական հարցերի մշտական հանձնաժողովի՝ նոյեմբերի 26-ի նիստում առաջին ընթերցմամբ քննարկվել է ««Գնահատման գործունեության մասին» օրենքում փոփոխություններ և լրացումներ կատարելու մասին» օրենքի նախագիծը:

ՀՀ կադաստրի կոմիտեի ղեկավարի տեղակալ Նանե Ղազարյանի ներկայացմամբ առաջարկվող փոփոխություններով և լրացումներով սահմանվում են նոր հասկացություններ, որոնք անհրաժեշտ են իրավական հստակություն ապահովելու համար: Նախատեսվում է գնահատման գործունեության իրականացում նաև ծառայություններ մատուցողների միջոցով, ինչը կնպաստի շուկայի մասնագիտական ներուժի և մատուցվող ծառայությունների բազմազանության ընդլայնմանը:

Հիմնական զեկուցողի խոսքով՝ նախագծով մեծ հնարավորություններ են ստեղծվում ՀՀ-ի կողմից որակավորում ստացած անձանց համար՝ իրենց գործունեությունն ընդլայնելու և ծավալելու նաև ՀՀ տարածքից դուրս:

Նանե Ղազարյանը, պատասխանելով պատգամավորների հարցերին, ներկայացրել է պարզաբանումներ ՀՀ-ի կողմից որակավորված անձանց համար սահմանված չափորոշիչներն ավելի խստացնելուն միտված կարգավորումների վերաբերյալ:

Նախագիծը ստացել է դրական եզրակացություն: