Աղվան Հովսեփյանն անդրադարձել է ընտրակաշառքին և վարչական ռեսուրսի օգտագործմանը

ՀՀ գլխավոր դատախազ Աղվան Հովսեփյանն ընդունել է Եվրոպայի խորհրդի խորհրդարանական վեհաժողովի (ԵԽԽՎ) պատվիրակությանը՝ տիկին Կարին Ուոլդսեթի գլխավորությամբ։

Դատախազության մամուլի ծառայությունից հայտնում են, թե, ողջունելով հյուրերին, ՀՀ գլխավոր դատախազը հավաստել է դատախազության վճռականությունն ու պատրաստակամությունը' հետամուտ լինել առաջիկա նախագահական ընտրությունների ընթացքում հնարավոր ընտրախախտումների վերաբերյալ հաղորդումների պատշաճ գրանցմանն ու քննարկմանը, դրանց համարժեք քրեաիրավական գնահատական տալուն։ Ա.Հովսեփյանը տեղեկացրել է, որ իր հրամանով հունվարի 14-ին ստեղծվել է աշխատանքային խումբ՝ ընտրախախտումների վերաբերյալ հաղորդումների ընդունման, գրանցման և քննարկման նկատմամբ դատախազական հսկողություն իրականացնելու համար։ Խմբում ընդգրկվել է 12 դատախազ։ Աշխատանքային խմբի գործունեության համակարգումը կիրականացնի ՀՀ գլխավոր դատախազի տեղակալ Արամ Թամազյանը։

Աշխատանքային խումբը ոչ միայն հսկողություն է իրականացնելու գրավոր ստացված հաղորդումների պատշաճ գրանցման ու քննարկման նկատմամբ, այլ նաև իրականացնելու է լրատվամիջոցների մշտադիտարկում՝ քննարկման առարկա դարձնելով հանցագործության հատկանիշներ պարունակող ընտրախախտումների վերաբերյալ մամուլի հրապարակումները։

«Ընտրական այս գործընթացում իրավապահ մարմինների հիմնական խնդիրն է կանխարգելել ընտրական իրավունքի դեմ ոտնձգությունները, խախտումներ արձանագրվելու դեպքում հետևողական լինել համարժեք քրեաիրավական գնահատական տալուն։ Քաղաքացին պետք է վստահ լինի, որ հանցագործության մասին իր ահազանգը պատշաճ քննության առարկա կդառնա, և հանցագործը կպատժվի, իսկ այդ վստահության գրավականը հրապարակայնությունն է»,- ասել է գլխավոր դատախազը՝ հավաստելով, որ ապահովվելու է աշխատանքային խմբի գործունեության հրապարակայնությունը։

Հյուրերի խնդրանքով Ա.Հովսեփյանն անդրադարձել է ընտրակաշառքի, ընտրությունների ընթացքում վարչական ռեսուրսի օգտագործման համար օրենքով նախատեսված պատասխանատվության միջոցներին և նշել, որ այս ընտրությունների ընթացքում ևս դատախազությունը բացատրական աշխատանքներ է իրականացնելու հասարակության առավել լայն շրջանակներում՝ իրազեկելու համար։