Գյումրիում կարծես այսօր երկրաշարժը կրկնվում է․ Հուսիկ քահանա Գրիգորյան

Հայ Առաքելական Եկեղեցու պատարագը տեղի ունենալու Գյումրու կամ Շիրակի մարզի այլ եկեղեցիներում, որտեղ քահանաները այն մատուցելու են կանոնական պատարագի ձևով՝ չշեղվելով մեր հայրապետական կարգից։ Այս մասին լրագրողների հետ զրույցում ասել է Գյումրիի Յոթ վերք եկեղեցու հոգևոր հովիվ տեր Հուսիկ քահանա Գրիգորյանը։

«Մենք ունենք անգամ այդպիսի խրատ, որը վերաբերվում է հայրապետի անունը զեղչելուն, որ նշանակում է, թե եթե մենք զեղչում ենք՝ անեծքի տակ ենք ընկնում։ Դա ոչ թե անձնական հարաբերության հարց է, այլ ճշտության ու եկեղեցու կարգ ու կանոնը պահպանելու հարցն է»։

Քահանան հայտնեց, որ այսօր նախատեսվում էր, որ Տեր Գառնիկը իր անդրանիկ պատարագը պիտի մատուցեր եկեղեցում, սակայն վերջին մի քանի օրերի ընթացքում մի շարք հանգամանքների բերումով փոխություններ են տեղի ունեցել։ 

«Նա շատ երկար տարիներ ծառայել էր Սուրբ Աստվածածին Յոթվերք եկեղեցում, այսինքն այս եկեղեցին իր համար շատ հոգեհարազատ է տեղ է այդ իմաստով, նա ուզում էր մատուցեր իր անդրանիկ պատարագը Սուրբ Աստվածածին եկեղեցում, բայց հանգամանքները թույլ չտվեցին, նաև որովհետև նա Վեհափառ հայրապետի՝  նոր ձեռնադրված հոգևորականների հետ հանդիպմանը պիտի մասնակցեր, ուստի չէր հասցնի»։ 

Տեր Հուսիկը նաև հայտնեց, որ ինքն իր հոգևոր ծառայությունան 18 տարիներից 15-ն անցկացրել է Շիրակի մարզում, ու այն ինչ կատարվում է այսօր Գյումրիում աննախադեպ ու ցավալի դրություն է։  «Մենք բնականաբար ցավ ենք ապրում, մանավանդ այս օրը, որ Գյումրիի համար անմեղ զոհերի հիշատակության օր է, մարդկանց համար հիշատակության օրեր և հոգեհանգստյան օր է, բայց այս օրը մի տեսակ երկրաշարժի կրկնություն ենք նկատում, կարծես թե Գյումրիում այն ցնցումը, որ եղել էր 37 տարի առաջ, այսօր  նորից կրկինվում է, այդ ցնցման հետևանքը քանդում է, ավերում է, փչացում է  նաև այսօրվա խորհուրդը»,-ասաց քահանան։