ՏԿ նախարարին կից կոլեգիայի այս տարվա առաջին նիստը

ՀՀ տարածքային կառավարման նախարարին կից կոլեգիայի այսօրվա նիստում ներկայացվեցին 2012թ. համայնքների բյուջեների կատարողականի ցուցանիշները: Համայնքների բյուջեների փաստացի մուտքերը նախատեսված 106.6 մլրդ դրամի դիմաց կազմել են 95.4 մլրդ դրամ (կատարողականը՝ 89.5%): 2011 թ. համեմատ ընդամենը եկամուտների հավաքագրման ցուցանիշն աճել է 9.1%-ով կամ 7.9 մլրդ դրամով: Սեփական եկամուտները կազմել են ընդամենը եկամուտների 29.7%-ը: Սեփական եկամուտները նախատեսված 32.5 մլրդ դրամի դիմաց փաստացի կազմել են 28.4 մլրդ դրամ (կատարողականը՝ 87.3%): 2011 թ. համեմատ սեփական եկամուտների հավաքագրման ցուցանիշն աճել է 13.6%-ով կամ 3.4 մլրդ դրամով: Այս մասին տեղեկացնում է ՏԿՆ հասարակայնության հետ կապերի բաժինը։

Նիստը վարող փոխվարչապետ, տարածքային կառավարման նախարար Արմեն Գեւորգյանն ընդհանուր առմամբ դրական համարելով միտումները՝ նշեց, որ 2012թ. հիմնական վարչարարական խնդիրներն արձանագրվել են հողի հարկի հավաքագրման եւ օրենսդրական փոփոխություններով պայմանավորված՝ պետական տուրքերի ծավալներում: Փոխվարչապետը նախարարության պատասխանատուներին հանձնարարեց 2013թ. որոշ համայնքներում ֆինանսատնտեսական գործունեության վերաբերյալ նպատակային ստուգումներ իրականացնել:

Նիստում ներկայացվեց նաեւ մարզային զարգացման ծրագրերով նախատեսված աշխատանքների կատարման վերաբերյալ տեղեկություն՝ վեց մարզի մասով, մյուս չորս մարզի մասով արդյունքները կամփոփվեն մինչեւ փետրվարի 1-ը: Բարձրացվեց ծրագրի կատարման նկատմամբ իրականացվող մոնիտորինգի մեթոդաբանության փոփոխությունների հարցը, ինչը կարեւոր է մոնիտորինգի ընթացքում միասնականության ապահովման տեսանկյունից: Փոխվարչապետը հանձնարարեց առաջարկություններ մշակել մեթոդաբանության մեջ փոփոխություններ կատարելու համար՝ կարեւորելով 2013թ. մոնիտորինգն արդեն նոր մեթոդաբանությամբ իրականացնելու հանգամանքը:

Կոլեգիան ի գիտություն ընդունեց ՏԿՆ միգրացիոն պետական ծառայության պետ Գագիկ Եգանյանի ներկայացրած «Հայաստանի Հանրապետության միգրացիայի պետական կարգավորման քաղաքականության հայեցակարգի իրականացման 2012-2016 թվականների գործողությունների ծրագրի» իրականացման մոնիտորինգի հաշվետվությունը:

Գործողությունների ծրագիրը ներառում է 14 գերակա ուղղություն, որոնց համար ընդհանուր առմամբ նախատեսվում է 147 կոնկրետ գործողությունների իրականացում: 2012թ. համար նախատեսված 83 գործողություններից, որից 54-ի պատասխանատուն Միգրացիոն պետական ծառայությունն է, ամբողջությամբ իրականացված է 78-ը, մասամբ է իրականացված 5-ը: Այսպիսով, 2012թ. նախատեսված միջոցառումներն իրականացված են 97 տոկոսով:

«Հայաստանի համայնքների միություն» իրավաբանական անձանց միության նախագահ Էմին Երիցյանը տեղեկություններ ներկայացրեց «Եվրոկովկաս» միջտարածաշրջանային համագործակցության արդյունքների մասին: Դեռեւս 2009թ. հիմնադրված «Եվրոկովկաս»-ի շրջանակում Հայաստանի հյուսիսային երեք մարզերը՝ Լոռին, Տավուշը, Շիրակը համագործակցում են Վրաստանի չորս հարավային շրջանների հետ: Է. Երիցյանի գնահատմամբ, փոխգործակցության այդ ձեւաչափը կայացել է, տարբեր ոլորտներում իրականացվել են մի շարք միկրոծրագրեր: Այն առավել արդյունավետ դարձնելու համար կարեւորվեց նաեւ տարածքային կառավարման մարմինների դերի ակտիվացումը:

Փոխվարչապետն առաջարկեց առաջիկայում հանդիպում կազմակերպել համապատասխան մարզպետների, համայնքների ղեկավարների հետ՝ «Եվրոկովկաս»-ի շրջանակում համագործակցության հարցերի քննարկման նպատակով: Գործարկվել է նաեւ «Եվրոկովկաս»-ի կայքը՝ http://www.eurocaucasus.org/:

Է. Երիցյանն առաջարկություններ ներկայացրեց նաեւ տարածքներում զբոսաշրջային զարգացմանը տեղական իշխանությունների դերի մեծացման վերաբերյալ: Փոխվարչապետն առաջարկեց ներկայացնել առավել ամբողջական փաթեթ՝ նշելով նաեւ գործիքակազմը: Կոլեգիան որոշեց դիմել ՀՀ էկոնոմիկայի նախարարին՝ նախարարության կոլեգիայի նիստում փաթեթը քննարկելու առաջարկով: