Հայտնիները և ժամկետնանց ապրանքները

Չնայած իրենց զբաղվածությանը` շոու-բիզնեսի հայտնի մայրիկները, որ երբեմն գնումների են գնում, անպայման ստուգում են պահպանման ժամկետներն ու ապրանքատեսակի որակը, քանի որ նրանք անտարբեր չեն իրենց և իրենց փոքրիկների առողջության հանդեպ: Ի դեպ, նրանք չեն լռում, երբ խանութում անորակ ապրանք են տեսնում, ինչը խորհուրդ են տալիս նաև քեզ: Սոֆի Դևոյան Սոֆի Դևոյանը, որ նաև քաղցրավենիքի սեփական արտադրությամբ է զբաղվում, շատ խիստ է վերաբերվում սննդի որակին: Իրենց արտադրանքին պարուհին բծախնդրորեն է մոտենում, քանի որ այլ արտադրողների սնունդ գնելիս էլ ստուգում է թե՛ պիտանիության ժամկետը, թե՛ բաղադրությունը: Տիկին Դևոյանն առհասարակ նախընտրում է հայկական արտադրության սնունդ, բայց, օրինակ, պանիր գնելիս նախապատվությունը տալիս է արտասահմանյան տեսականուն: Դերասանուհին հիշեց, որ մի անգամ խանութում նկատել է իրենց արտադրած փոփ քորնի կեղծ օրինակներ, որոնց վրա նշված չի եղել ո՛չ պահպանման ժամկետ, ո՛չ էլ արտադրողի անունը: Բնականաբար, բիզնես լեդին չի հանդուրժել կեղծիքը և դիմել է խանութի մենեջերին, որից հետո կեղծ փոփ քորնը վերացվել է խանութից:

Ալլա Լևոնյան
Քանի որ երգչուհի Ալլա Լևոնյանը տարվա ընթացքում մի քանի անգամ լինում է արտասահմանում՝ հատկապես ԱՄՆ-ում, հենց այնտեղից էլ կատարում է իր բոլոր գնումները՝ թե՛ երեխաների, թե՛ իր և ամուսնու հագուստը, որոնք հիմնականում բրդյա կամ բամբակյա են: Երգչուհին ասում է, որ անձամբ խանութ հազվադեպ է գնում և անգամ չգիտի դրանց գտնվելու վայրը: Սննդի հարցերը լուծում է ամուսինը, ով շատ ուշադիր է հատկապես պահպանման ժամկետների նկատմամբ: Երգչուհին ասաց, որ երբևէ ժամկետանց սնունդ չեն գնել, բայց եղել են դեպքեր, երբ վաճառողուհուց հարցրել է քաղցրավենիքի թարմ լինելը, անկեղծորեն խորհուրդ են տվել չգնել այն:

Դիանա Գրիգորյան
Հաղորդավարուհի Դիանա Գրիգորյանը նույնպես մշտապես հետևում է գնվող սննդի պիտանիության ժամկետին և շատ լուրջ է վերաբերվում թե՛ սննդի և թե՛ հագուստի որակին: Հաղորդավարուհին երբևէ չի հանդիպել ժամկետանց սննդի: Ինչ վերաբերում է հագուստին՝ Դիանան նախընտրում է բրենդային հագուստ, որոնք որակյալ են և չեն վնասում առողջությանը: Նա նկատեց, որ այն սուպերմարկետների կամ խանութների աշխատակիցները, որտեղից մշտապես գնումներ է կատարում, շատ բարեհամբույր են սպասարկում և բարձրորակ ապրանք են առաջարկում, ուստի միայն այդ խանութներից է կատարում բոլոր գնումները:

Արմինկա
Երգչուհին չափազանց ուշադիր է սնունդ գնելիս, քանի որ շատ հաճախ է հանդիպում ժամկետանց կաթնամթերքի, յոգուրտների ու հյութերի: Երգչուհին նաև նկատել է, որ որոշ խանութներում պահպանման ժամկետը երկարացված է, ինչի մասին զգուշացնում է խանութի աշխատակցին:

Հագուստի պարագայում էլ երգչուհին միշտ զգուշանում է՝ նախընտրելով բնական հումքից կարված հագուստ և չի առաջնորդվում միայն պիտակին նայելով: Երգչուհուն չի գոհացնում նաև մեր երկրում սպասարկման ոլորտի մակարդակը. նրա կարծիքով, դեռ բավականին հետ ենք զարգացած երկրներից:

Լուիզա Ներսիսյան
Լուիզա Ներսիսյանը մինչ որևէ գնում կատարելն անպայման ստուգում է պահպանման ժամկետը և նախընտրում է գնել այն սնունդը, որի պահպանման ժամկետը կարճ է: Բարեբախտաբար, դերասանուհուն երբեք ժամկետանց սնունդ չեն առաջարկել, սակայն մի անգամ խանութում նկատել է բորբոսնած լավաշ և այդ մասին զգուշացրել վաճառողուհուն: Ինչ վերաբերում է հագուստին, ապա Լուիզան այն «զգում» է մաշկով, քանի որ եթե անգամ պիտակին գրված է 100% բամբակ, իսկ մաշկը «հարմարավետ» չի զգում, նշանակում է՝ այն լրիվ բամբակյա չէ:

Նյութը՝ esyes.am-ի