«168 ժամ». Մոտ մեկ ամիս Հայաստանը կապրի նախընտրական մթնոլորտում

Երկուշաբթի օրը պաշտոնապես մեկնարկում է ՀՀ նախագահական ընտրությունների քարոզարշավը: «168 ժամ»-ն առաջնորդողում գրում է, որ մոտ մեկ ամիս Հայաստանը կապրի նախընտրական մթնոլորտում, թեկնածուները կներկայացնեն իրենց ծրագրերը, քարոզչական նյութերն ու հոլովակները, կհանդիպեն ընտրողների հետ, կփորձեն ապացուցել, որ հատկապես իրենք են ամենաշատը մտահոգ քաղաքացիների հոգսերով: Այս քարոզարշավը, սակայն, տեղի է ունենալու ընդամենը մեկ պատճառով՝ այդպես է պահանջում Ընտրական օրենսգիրքը և ընտրությունների անցկացման միջազգային պրակտիկան: Իրականում քարոզարշավի անցկացման որևէ այլ պատճառ գոյություն չունի:

Հայաստանում ընտրությունների արդյունքների վրա ազդեցության տեսանկյունից թեկնածուների ծրագրերն ու նախընտրական քարոզարշավի մյուս ատրիբուտները գտնվում են, թերևս, ամենավերջին տեղում: Ընտրություններում որոշիչը թեկնածուների անձերն են ու նրանց պատկանելությունը՝ իշխանական կամ ընդդիմադիր ճամբարին: Հանգամանքների բերումով, վերջինիս դերում հայտնվել են Հրանտ Բագրատյանն ու Րաֆֆի Հովհաննիսյանը: Անկախ նրանից՝ ուժե՞ղ թեկնածուներ են նրանք, թե՞ ոչ այնքան, փաստ է, որ նրանք չեն ներկայացնում իշխանությունը: Եթե, իհարկե, չառաջնորդվենք Հայաստանում ամենատարածված՝ դավադրությունների տեսությամբ, ըստ որի՝ Րաֆֆին ու Բագրատյանն առաջադրվել են բացառապես Ս. Սարգսյանին լեգիտիմացնելու նպատակով:

Ի դեպ, այդ վարկածի ամենաջերմեռանդ կողմնակիցներն ու տարածողները Բագրատյանի ոչ վաղ անցյալի թիմակիցներն են: Բոլոր այն ուժերը, մասնավորապես՝ ՀԱԿ-ը, ՀՅԴ-ն, ովքեր թեկնածու չեն առաջադրել, հայտարարում են, թե սպասում են թեկնածուների կողմից ներկայացվելիք ծրագրերին՝ նրանց վերաբերյալ դիրքորոշում արտահայտելու համար: Այդպիսով, ի դեպ, նրանք հերթական անուղղակի ծառայությունն են մատուցում Ս. Սարգսյանին՝ առաջիկա ընտրությունները տեղափոխելով ծրագրային հարթություն: