«Առավոտ». Մարաշից ոտքով իջնելիս՝ Րաֆֆի Հովհաննիսյանը երբեմն սահում է և ընկնում

Դուք ամեն օր ոտքով Մարաշից իջնում եք կենտրոն, դա առողջությա՞ն համար եք անում, մարդկանց հետ շփվելո՞ւ, թե այլ բանի։ «Առավոտ»-ի հետ զրույցում այս հարցին ի պատասխան «Ժառանգություն» կուսակցության առաջնորդ Րաֆֆի Հովհաննիսյանը ճշտեց.

«Ամեն օր չէ: Արդեն մի քանի տարի է, որ փորձում եմ առողջ ապրել, մարզված լինել, թեև միշտ չէ, որ ստացվում է։ Ես նախընտրում եմ քայլել, եթե ուշանում եմ՝ հանրային տրանսպորտ նստել։ Բայց քայլելը նաև հնարավորություն է տալիս մաքուր օդ շնչել, մարզվել, և, իհարկե, եթե քաղաքացի կա, որ իր պահանջը ունի, քննադատությունը, խնդրանքը, մեկ-մեկ նաև՝ զորակցության արտահայտումը, դա ինձ համար անհրաժեշտ է։ Բայց PR նոր շրջանառությունը, որ կա՝ Րաֆֆին գնաց ինքնաթիռի մեջ ինչ-որ մի բան արեց, և դա PR էր, մինչդեռ ինքը գնում էր հորը շնորհավորելու, Րաֆֆին գնաց Բաքու՝ ինչ-որ բան անելու համար, թեև Բաքու ես հրավիրված էի... Կյանքում որոշ բաներ լինում են իսկապես՝ բնական, առանց որևէ մեկի պլանավորման, և հատուկ նպատակ չի հետապնդում։ Իմ քայլելը Երևանի փողոցներում դա իմ բնական վիճակն է։ Մի քիչ դժվարանում եմ ձմռանը, մեկ-մեկ սահում և ընկնում եմ, ուրախ եմ, որ դուք չեք արձանագրում այդ պահը։ Կարող եմ նաև ընկնել։ Այդ ցավն ինձ նաև ուժ է տալիս»։