Դու կարող ես տանկային բրիգադներ ունենալ առաջնագծում, իսկ խնդիրը լուծվի այլ տեղ ու այլ պայմաններում. Աբրահամյան

ԱԺ «Պատիվ ունեմ» խմբբակցության պատգամավոր Տիգրան Աբրահամյանը գրում է.

«Վենեսուելայի ու նրա նախագահի նկատմամբ ամերիկյան օպերացիան ռազմական տեսանկյունից այն բանի հաստատումն է, որ ժամանակակից պատերազմի մտահղացման, պլանավորման, վարման կանոնները ոչ միայն արմատական փոփոխությունների են ենթարկվել, այլ դարձել են շատ բազմաշերտ:

Ամիսներ շարունակ ԱՄՆ-ից բաց տեքստով անոնսում էին գործողություններ և պարզ է, որ այստեղ անսպասելիության գործոնի խնդիր չի դրվել:

Մյուս կողմից, գործողության բուն մարտական ֆազայի թիկունքում քարոզչական, հետախուզական, գործակալական, տեխնոլոգիական, դիվերսիոն, քաղաքական մեծածավալ միջոցառումներ են, որոնք հասունացրել և առավելագույնս մատչելի մատուցում էին կատարել բանակին և հատուկ նշանակության ստորաբաժանումներին:

Պարզ ասած, դու կարող ես տանկային բրիգադներ, հրետանային դիվիզիաներ ունենալ, առաջնագծում մարտական հերթապահություն ունեցող մեծաթիվ անձնակազմ ու մեծաքանակ սպառազինություն, իսկ խնդիրը լուծվի այլ տեղ ու այլ պայմաններում:

Ժամանակակից զսպման, կանխարգելման և ուժերի բալանս ապահովող մեխանիզմներն ու գործոնները մեծ փոփոխություններ են կրել:

Ովքեր երկարաժամկետ կտրվածքով գործում են այդ տրամաբանության մեջ, նրանք կարող են պատերազմը չսկսած էլ հաղթել, իսկ ովքեր օրվա իրողությունների և միայն կարճաժամկետ պլանավորումների ու խնդիրների լուծման մեջ են բանակ, պետություն կառուցում, նրանք ի սկզբանե դատապարտված են ֆիասկոյի»: