Նոննա Գրիգորյանն ու Վահագն Կիրակոսյանը սպասում են իրենց առաջնեկին

Երեւանի կամերային թատրոնի դերասանուհի Նոննա Գրիգորյանի եւ «Բարեկամություն» անսամբլի պարող Վահագն Կիրակոսյանի ամուսնության մասին BRAVO.am-ը պատմել է դեռ նախորդ տարի: Իսկ օրերս մեզ հայտնի է դարձել, որ նրանք շուտով ծնողներ կդառնան. զույգի առաջնեկը կծնվի ապրիլի վերջին:

Ապագա մայրիկն այժմ հղիության վեցերորդ ամսում է եւ աշխատանքային դադար է վերցրել. «Մինչեւ դեկտեմբեր բոլոր ներկայացումներին մասնակցել եմ, առանց հոգոց հանելու աշխատել, բայց հիմա բեմական զգեստներն արդեն փոքր են… :): Մինչեւ բալիկիս ծնվելը կհանգստանամ, իսկ աշխատանքի կանցնեմ նոր խաղաշրջանից՝ սեպտեմբերին»:

Մեզ հետ զրույցում Նոննան ասել է, որ հղիությունը շատ թեթեւ է տանում. «Իմ մանկաբարձ-գինեկոլոգն ասում է, որ իր տեսած ամենաուրախ հղի կինն եմ: Այս ընթացքում էներգիաս կրկնապատկվել է:)»:

Զույգը պարզել է երեխայի սեռը. աղջիկ են ունենալու, որի անունը դեռ չեն որոշել. «Երեք ամիս ունենք այդ հարցի շուրջ «վիճելու» համար:): Ամուսինս իր տարբերակներն է առաջարկում, ես էլ՝ իմ, համաձայնության դեռ չենք եկել: Նշեմ, որ մեր զգացմունքներն ուժգնացել են ու վերաիմաստավորվել. եթե առաջին տարում է այսպես, ապա մեր ամուսնական կյանքը տարեցտարի առավել հաճելի կդառնա:)»:

Խոսելով զավակի սպասվելիք ծննդյան մասին՝ դերասանուհին հետեւյալն է նշել. «Երեխային անհրաժեշտ իրերը կգնենք առաջիկայում: Հիմա համացանցում անընդհատ կարդում եմ մայրական խնամքի, հղիության մասին նյութեր: Գիտեմ, որ հղիության վեցերորդ ամսում բացվում են պտղի աչքերը, գրեթե ամբողջությամբ ձեւավորված է նաեւ մազերի, աչքերի գույնը: Իմ բալիկն արդեն 30 սմ հասակ ունի, քաշն էլ 830 գրամ է»:

Նոննա Գրիգորյանի ամուսինը՝ Վահագնը, բացի պարելուց, երեխաներին դասավանդելուց ու պարային բեմադրություններ անելուց, վերջերս նաեւ խաղում է Կամերային թատրոնի «Կաբարե» երաժշտական ներկայացման մեջ ու բեմադրում ներկայացումների պարային տեսարանները.«Դեկտեմբեր ամսին ինձ բախտ վիճակվեց ամուսնուս եւ բալիկիս հետ ներկայացում խաղալ, կատակով ասում էին՝ ընտանիքով ենք բեմ դուրս գալիս»:

Առաջնեկի ծնվելուց հետո նա շարունակելու է բեմ բարձրանալ, նոր առաջարկների դեպքում նաեւ կերեւա հեռուստաէկրաններին.«Հիմա դադար վերցնելը ճիշտ է, ինչը հետո կնպաստի աշխատունակությանս վրա, սիրով կվերադառնամ իմ դերասանական աշխատանքին»: