Լիդուշիկի «մեծ հաղթանակը»

Վերջապես տեղի ունեցավ տաղանդաշատ փոքրիկ երգչուհի Լիդուշիկի առաջին մենահամերգը Գյումրիի Վարդան Աճեմյանի անվան դրամատիկական թատրոնում: Armstar.am-ի հետ զրույցում տպավորություններով կիսվեց Լիդուշիկի տատիկն ու պրոդյուսերը՝ տիկին Գոհարը:

«Մենք այնքան ցնցված ենք՝ չնայած գյումրեցիներից սպասում էինք այսքան ջերմ ընդունելության: Դա մեծ հաղթանակ էր Լիդուշիկի համար: Կարծում եմ՝ որպես արտիստ, երգչուհի, Լիդուշիկը պետք է ունենար իր մենահամերգը, որն իր համար կծառայի որպես այցեքարտ: Ուրախալի էր, որ գյումրեցիները ծանր կացության մեջ լինելով, չզրկեցին իրենց երեխաներին համերգը վայելելու հնարավորությունից»,- պատմեց տիկին Գոհարը:

Ասվածն ապացուցում է այն, որ համերգի տոմսերը վաճառքի դուրս գալուց մեկ շաբաթ անց արդեն սպառվել էին:

Քանի որ դահլիճում ցուրտ էր, հանդիսատեսը կարծում էր, որ Լիդուշիկը կենդանի հնչողությամբ ելույթ չի ունենա: Զարմանալին այն էր, որ նրանց համար բավական էր միայն աղջկան տեսնելը: Եվ չնայած ցրտին՝ Լիդուշիկը 1.5 ժամ կենդանի կատարումներով ուրախացրեց գյումրեցի հանդիսատեսին: Համերգից հետո երկրորդ, երրորդ համերգ էին պահանջում: Առանց հաղորդավարի Լիդուշիկը կարողացավ լեփ-լեցուն դահլիճում ջերմ մթնոլորտ հաստատել և անմիջական կապ ստեղծել հանդիսատեսի հետ: Բոլոր երգերը երգում էին ոչ միայն երեխաները, այլև նրանց ծնողները:

Համերգի ժամանակ փոքրիկ երգչուհին նաև շվի նվագեց, իսկ ելույթների ընդմիջումներին ելույթ էր ունենում Գեորգի Զոհրաբյանի «Angels» պարային համույթը:

«Կցանկանայի շնորհակալություն հայտնել Գեորգի Զոհրաբյանին, Էդգար Ալեքսանյանին, ով գործիքավորել է Լիդուշիկի գրեթե բոլոր երգերը, Ռուզաննա Ջամբալյանին, ով զբաղվում է աղջնակի վոկալով և հատուկ շնորհակալություն երգերի բոլոր հեղինակներին՝ Ավետ Բարսեղյանին, Մանե Հակոբյանին, Ռիչարդ Մադլենյանին, Իննա Մկրտչյանին, Էդգար Ալեքսանյանին, Արմեն Գևորգյանին, Հասմիկ Հախվերդյանին, Անժելա Գինոսյանին, Հռիփսիմե Խրիմյանին, Արսեն Գրիգորյանին»,- եզրափակեց տիկին Գոհարը: