«Հրապարակ». Չի կարող երկիրն այս վիճակում մնալ, չի կարող հասարակությունն իր միջից նոր ուժեր չծնել, նոր պրոցեսներ չձևավորել

Տխուր, միապաղաղ ընտրություններ են. երբևէ նման ձանձրալի ընտրարշավ չեմ հիշում՝ բողոքում եմ ընկերներիցս մեկին, ով քաղաքագիտական վերլուծություննեիի մեծ մասնագետ է: «Ոչինչ,- մխիթարում է նա ինձ,- փոխարենը հետընտրական շրջանն է հետաքրքիր լինելու»: 

Ըստ նրա տեսության, փետրվարի 18-ից հետո մեզ բուռն զարգացումներ են սպասվում՝ արդեն իսկ դրա ծիլերը նկատելի են:
«Չի կարող երկիրն այս վիճակում մնալ, չի կարող հասարակությունն իր միջից նոր ուժեր չծնել, նոր պրոցեսներ չձևավորել»,- բացատրում
է նա: Մի կողմից նոր ընդդիմություն պետք է ձևավորվի երկրում, և դրա համար այսօրվա ընդդիմության բեկորները կմիավորվեն-
կտարանջատվեն-կբյուրեղանան, նոր ընդդիմադիրներ ասպարեզ կգան: 

Մյուս կողմից, իշխանության մեջ գտնվող ուժերը պետք է վերակազմավորվեն՝ «ռեստարտ» լինեն, որ հաջորդ ընտրություններում կարողանան մրցունակ լինել և ջրի երեսին մնալ: Պարզից էլ պարզ է, որ, ասենք, «Օրինաց երկիր» կուսակցությունը 2017-18-ին չի կարող գործոն լինել: Ինչպես այս տեսքով չի կարող լինել նաև Հանրապետականը: Այսօր արդեն նկատելի են այն երեք թևերը, որոնք կարող են ձևավորվել այսօրվա ՀՀԿ-ից՝ տիգրանսարգսյանական, հովիկաբրահամյանական և կարենկարապետյանական: Թե դրանցից որն ավելի կենսունակ կլինի և կկարողանա նոր ժամանակների ոգով վերակառուցվել, ցույց կտա ժամանակը:

Նախկին տեսքով չի կարող գոյատևել նաև Դաշնակցությունը՝ եթե այսպես շարունակվի, ՀՅԴ-ն 2017-ին ավելի խեղճ ու անօգնական կլինի: Էլ չենք խոսում ՀՀ նախագահի 2013-ի ընտրություններին չմասնակցող ԲՀԿ-ի, «Ազատ դեմոկրատների», «Հանրապետության», ՀՀՇ-ի և մյուսների մասին, որոնք, անկախ տարբերություններից, մազից կախված վիճակում են, և հայտնի չէ, թե 2 տարի անց նրանցից ինչ կմնա ասպարեզում: