«ՀԺ». Քարոզարշավը Հայաստանում նշանավորվեց մի քանի խղճուկ իրադարձություններով

Երեկ մեկնարկեց 2013 թվականի փետրվար 18-ին կայանալիք ՀՀ նախագահական ընտրությունների պաշտոնական քարոզարշավը:

Ցանկացած երկրի ապագայի համար կարևորագույն այս միջոցառման առաջին օրը Հայաստանում նշանավորվեց մի քանի խղճուկ
իրադարձություններով: Նախագահի թեկնածուներից մեկը Րաֆֆի Հովհաննիսյանը մոտ 100 մարդու ներկայությամբ ելույթ ունեցավ
երևանի «Արամ Խաչատրյան» համերգասրահի հրապարակում, ապա մի քիչ քայլեց քաղաքում, մեկ այլ թեկնածու Անդրիաս Ղուկասյանը
Երևանի կենտրոնական փողոցներից մեկում տեղավորվեց հացադուլի, նախկին վարչապետ Հրանտ Բագրատյանը այցելեց
Վերին Արտաշատ՝ ընտրողների հետ հանդիպման, իսկ Հանրապետական կուսակցության նախագահի թեկնածու Սերժ
Սարգսյանը փակ հանդիպում անցկացրեց կուսակցության ակտիվի հետ:

Քարոզարշավի մեկնարկի մասին հիշեցրեցին նաև քաղաքի տարբեր փողոցներում, գովազդային վահանակների և շենքերի պատերի վրա հայտնված տարբեր թեկնածուների մեծադիր պատկերները, որոնք շարքային քաղաքացիները նույնիսկ չեն էլ նկատում, և քարոզարշավի համար նախատեսված հեռուստաեթերի առաջին թողարկումը, որին նույնպես, ինչպես ցույց տվեցին «ՀԺ» հարցումները, շարքային քաղաքացիները
կատարյալ անհաղորդ էին: Իսկ ամենավատն այն է, որ բոլոր կանխատեսումներով՝ քարոզարշավի ողջ ընթացքը կանցնի նույնքան տաղտկալի, որքան դրա առաջին օրն էր: Փետրվարի 18-ին կայանալիք ՀՀ նախագահական ընտրությունների քարոզարշավը կավարտվի փետրվարի 16-ին, ժամը 24:00-ին:

«Սերժ Սարգսյանը իր սվիտայի ուղեկցությամբ երեկ գնում էր դեպի «ապահով դահլիճ» ՝ նախընտրական հանդիպման: Նրան նամակ փոխանցելու նպատակով մոտեցած քաղաքացիներից մեկին, Սերժ Սարգսյանը հայտնեց, որ ինքը նախագահ չէ, այլ՝ նախագահի թեկնածու: Այդ դեպքում հարց է ծագում, թե ինչո՞ւ է թեկնածուներից մեկի վրա պետբյուջեից փող ծախսվում նման «ախրանայի» համար, իսկ մյուսների վրա՝ ոչ»,-
հավելում է «ՀԺ»-ն: