Փարաքարի սպանություններից հետո պաշտոնանկ եղած Բդոյանը կրկին բարձր պաշտոն է ստացել․ «Իշխանություն»

«Իշխանություն» լրատվականին հայտնի դարձավ, որ Մերձավանի աղմկահարույց սպանություններից հետո պաշտոնանկ եղած Արմավիրի մարզի ոստիկանապետ Արթուր Բդոյանը կրկին բարձր պաշտոն է ստացել։ Ներքին գործերի նախարարությունից հայտնեցին, որ նա նշանակվել է ոստիկանության համայնքային ոստիկանության գլխավոր վարչության օպերատիվ վարչության պետի տեղակալ։

Հիշեցնենք՝ Փարաքարի համայնքապետ Վալոդյա Գրիգորյանի և քրեական ոստիկանության աշխատակից Կարեն Աբրահամյանի սպանությունից հետո Արմավիրի մարզի իրավապահ համակարգում մի շարք բարձրաստիճան պաշտոնյաներ ազատվել էին զբաղեցրած պաշտոններից, այդ թվում՝ մարզի ոստիկանապետ Արթուր Բդոյանը։ Պաշտոնական հիմնավորում չկար, սակայն պատճառն առավել քան պարզ էր․ սպանությունները չէին կանխվել, Մերձավանում օպերատիվ իրավիճակը դուրս էր եկել վերահսկողությունից։
Սակայն այսօր պարզվում է, որ այդ «պատժիչ» որոշումները, փաստացի, չեն ունեցել ո՛չ իրավական, ո՛չ բարոյական հետևանք։ Ժամանակավոր պաշտոնանկությունները ավելի շատ հանրային դժգոհությունը մարելու ֆիկտիվ քայլեր էին։ Փաստորեն, մարդկանց ազատել են ոչ թե ձախողման, ծառայողական անգործության կամ համակարգային բացթողումների համար, այլ պարզապես՝ «մինչև կրքերը հանդարտվեն»։ Իսկ հետո նույն մարդիկ վերադարձել են համակարգ՝ նոր, ոչ պակաս ազդեցիկ պաշտոններով։

Այս պատմությունն ունի նաև ծանր բարոյական կողմ։ Արմավիրի մարզում ձևավորված քրեական միջավայրի և իրավապահների վերահսկողության բացակայության հետևանքով զոհվեց նաև ոստիկանության աշխատակից Կարեն Աբրահամյանը։