Մոսկվա-Երևան թռիչքի ժամանակ ծեծկռտուք է տեղի ունեցել. ձերբակալվածներ չկան

Ria.ru կայքի փոխանցմամբ Մոսկվայից Երևան ուղևորվող ինքնաթիռում ծեծկռտուք է տեղի ունեցել: Ռուսական լրատվամիջոցների տարածած տեղեկությունների համաձայն, դեպքը գրանցվել է S7 ավիաընկերությանը պատկանող օդանավում:

Մինչև թռիչքը երկու ուղևորների միջև վիճաբանություն է սկսել. Ուղևորներից մեկն արձակել է ամրագոտին ու հարվածել մյուսին, վկայում են ականատեսները:

Սկսվել է քաշքշուկ, ստեղծված իրավիճակում օգնության են շտապել ուղեկցորդուհիները: Ուղեկցորդուհիների հանդարտվելու հորդորները անուշադրության են մատնվել, որից հետո արդեն վիճաբանությանը խառնվել են օդանավի մյուս ուղևորները, ովքեր պահանջել են «կռվարար» հարևաններին հանդարտեցնել էլեկտրաշոկով:

Վերջիվերջո օդանավի անձնակազմը, ստիպված նրանց «բիզնես դասի» ուղևորների համար նախատեսված սրահ է տեղափոխել ու մինչև վայրեջքը այնտեղ է պահել:

Վայրեջքից անմիջապես հետո, հայ ոստիկանները ձերբակալել են կռվարար ուղևորներին: Այս մասին գրում է Ria.ru: 

Լուրեր.com-ի հետ զրույցում այս կապակցությամբ  ոստիկանության մամուլի ծառայությունից հայտնեցին, որ ձերբակալվածներ չկան: Օդանավի  ուղևորներից մեկը կենթարկվի վարչական պատասխանատվության: