Ոստիկանները կռիվ են սկսել ռեստորանում՝ Շուֆուտինսկու «գողական» երգերի պատճառով

Վրաստանում ոստիկանների միջև ծեծկռտուք է տեղի ունեցել ռեստորանում՝ ռուս երգիչ Միխայիլ Շուֆուտինսկու երգերի պատճառով, հայտնում է վրացական «ՏՎ Պիրվելի» հեռուստաընկերությունը։ Ըստ աղբյուրի՝ իրավապահներից մի խումբը ռեստորանում պատվիրել է ռուսական շանսոնի երգեր, ինչն առաջացրել է մյուս ոստիկանների դժգոհությունը։

Դեպքը տեղի է ունեցել Տկիբուլի քաղաքում գտնվող «Մոցամետա» ռեստորանում։ Տեղեկությունների համաձայն՝ հարևան սեղանի մոտ նստած քրեական ոստիկանության աշխատակիցները պահանջել են անմիջապես փոխել երաժշտությունը, ինչից հետո երկու խմբերի միջև վիճաբանությունը վերածվել է ֆիզիկական բախման։

Հեռուստաընկերության տվյալներով՝ ոստիկանները միմյանց ուղղությամբ նետել են տարբեր առարկաներ, իսկ հետո կռիվը շարունակվել է ռեստորանից դուրս։ Միջադեպը կարգավորելու համար դեպքի վայր է ժամանել պարեկային ոստիկանությունը։ Չորս մասնակցի նկատմամբ հարուցվել է գործ խմբակային բռնության հոդվածով, նրանց սպառնում է մինչև երկու տարվա ազատազրկում։