Ես անձամբ ամսի 8-ին ժամը 5-ին հանելու եմ իմ թեկնածությունը. նախագահի թեկնածու

«Ծրագրերի մրցություն չի լինելու, ընտրություն չի լինելու: Նա, ով մնում է թեկնածուների ցուցակում լեգիտիմացնում է իշխանությունը: Կան թեկնածուներ, որոնք դեկորացիայի մասնակիցներ են և  իրենց համար դժվար է լինելու թեկնածությունը հանելը»: Այսօր այս մասին լրագրողների հետ հանդիպմանն ասաց ՀՀ նախագահի թեկնածու Արամ Հարությունյանը:

Նախագահի թեկնածուն կոչ է անում բոլոր թեկնածուներին հանել իրենց թեկնածությունը. «Ես անձամբ ամսի 8-ին ժամը 5-ին հանելու եմ իմ թեկնածությունը, իսկ ամսի 7-ին ԿԸՀ-ի առջև հացադուլ կսկսեմ»,-հայտարարեց Արամ Հարությունյանը:

Նախագահի թեկնածուն ներկայացրեց իր երկու ծրագրերը՝ մինիմում և մաքսիմում: Մինիմումն այն է, որ Սերժ Սարգսյանին քվեաթերթիկում կթողնեն միայնակ, իսկ մաքսիմում ծրագիրն այն է, որ թեկնածությունը հանում է նաև գործող նախագահ Սերժ Սարգսյանը:

«Եթե հանգրվանն այն է, որ Րաֆֆին բոլորին բարևելով վերջում պետք է գնա և շնորհավորի Սերժ Սարգսյանին, ուրեմն դա չէ իմ հանգրվանը»,-ասաց թեկնածուն և հավելեց,- «եթե 46% չի գնալու ընտրության, ապա այդ ընտրությունները չեն կարող լեգիտիմ լինել»: