«Թուրքիայի դիրքորոշումը խոչընդոտում է ԼՂ հակամարտության լուծմանը». թուրք իրավապաշտպան

«1915 թվականին ցեղասպանություն ապրած հայ ժողովուրդը չցանակացավ, որ կրկնվի նույն պատմությունը Լեռնային Ղարաբաղում և միջամտեց հիմնահարցին` աջակցելով Ղարաբաղի բնակչության ինքնորոշման իրավունքին»,- նշել է թուրք իրավապաշտպան, ակտիվիստ և հրապարակախոս Ռագըփ Չարաքօլուն՝ «Սիվիլիթաս» հիմնադրամում տեղի ունեցած մամլո ասուլիսի ժամանակ: 

Ինչպես նա նշել է, թուրքական հասարակության իրազեկությունը՝ կապված Լեռնային Ղարաբաղի հակամարտության հետ, շատ ցածր մակարդակի վրա է: Այս հարցը ընդհանրապես չի վերաբերում Անկարային, սակայն թուրք կառավարությունը բարձրացնում է այն տարբեր միջազգային ասպարեզներում և հանդես է գալիս Բաքվի դիրքորոշման աջակցությամբ: 

«Միջամտելով Ղարաբաղի հակամարտությանը և այն խոչընդոտ դարձնելով հայ-թուրքական հարաբերություններում՝ Թուրքիան ցանականում է, որ Հայաստանը մոռանա 1915 թվականի դեպքերը: Այն կբերի տարածաշրջանային ճգնաժամի, քանի որ Թուրքիայի նման դիրքորոշումը հիմնական խոչընդոտն է Լեռնային Ղարաբաղի հակամարտության լուծման համար: Լինելով հզոր պետություն` Թուրքիան կարող էր իրեն այլ կերպ պահել, օգնել Ղարաբաղի արդար կարգավորմանը և այդպիսով հարթել հարաբերությունները Հայաստանի հետ: Սակայն ներկայիս դիրքորոշումը ցույց է տալիս, որ Թուրքիայում դեռևս առկա է պանթյուրքական գաղափարախոսությունը»,- ավելացրել է նա: 

Թուրք ակտիվիստը նշել է, որ Թուրքիայի դիրքորոշումը Հայաստանի և Սիրիայի նկատմամբ իրականում ամոթալի է: Փակված սահմանները սպառնալիք են Հայաստանի համար, սակայն Հայաստանը գնում է ամեն տեսակի զիջումների` կնքելով երկկողմանի պայմանագրեր: 

Թուրք իրավապաշպանը նաև նկատել է, որ ընդունելի չէ Թուրքիայի դիրքորոշումը Ստեփանակերտում օդանավակայանի բացման առնչությամբ: Թուրքիան դեմ է Ստեփանակերտում օդանավակայանի բացմանը, սակայն ինքը կանոնավոր թռիչքներ է կատարում Էրբիլից` Իրաքյան Քուրդիստանի մայրաքաղաքից: Իսկ Ադրբեջանի կողմից վարվում է շատ ագրեսիվ քաղաքականություն, որն ուղղակիորեն պատերազմի կոչ է: