Հնարավոր է` ընտրեմ գործող նախագահին. Արթուր Իսպիրյան

Նախագահական ընտրությունների քարոզարշավի մեկնարկն արդեն տրված է, ընտրություններին մնացել են հաշված օրեր: Մեզնից յուրաքանչյուրն արդեն փորձում է որոշակիրորեն հասկանալ, թե ով է այն թեկնածուն, ով պետք է ղեկավարի Հայաստանը առաջիկա 5 տարիների ընթացքում:

Slaq.am-ի հետ զրույցում երգիչ Արթուր Իսպիրյանը խոստովանեց, որ նախագահական ընտրությունները մեր երկրի ամենակարևորագույն գործընթացներից մեկն են և ինքն անձամբ հետաքրքրվում է դրանցով:

Վերջինս ճանաչում է նախագահի բոլոր թեկնածուներին և, ըստ նրա, թեկնածուներից յուրաքանչյուրն իր գնահատելի գծերն ունի:

Նրա խոսքով՝ պետք չէ, նախագահի պաշտոնի համար «գլուխ ջարդել», պետք է բոլորը համախմբվեն և պայքարեն, որպեսզի մեր երկիրը դառնա օրինակելի և գեղեցիկ երկիր, որը կունենա լուսավոր ապագա:

-Ծանոթ լինելով նախագահի թեկնածուներին, ի՞նչ ակնկալիքներ ունեք գալիք նախագահական ընտրություններից:

-Բոլոր թեկնածուները պետք է համախմբվեն. ճամբարներ ստեղծելով երկիրը երկիր չի դառնա, բոլորը պետք է համախմբվեն՝ օգնելով մեր երկրին: Ես չեմ կարծում, որ նախագահ փոխելով ինչ-որ բան պետք է փոխվի: Պետք է մարդկանց գիտակցությունը փոխվի դեպի հայրենիք:

Արած գործով են մարդուն գնահատում: Չեմ կարող ասել, թե մնացած թեկնածուները ինչ կարող են անել, համենայնդեպս ով էլ որ լինի, չպետք է այսպես շարունակվի, այլ պետք է շատ բաներ փոխվեն մեր կյանքում, որովհետև մարդկանց միջից պետք է հիասթափությունը հանվի, որովհետև ամենամեծ թշմանին արտագաղթն է: Պետք է նախագահն այնպես անի, որ հիասթափությունը և հուսահատությունը վերանա նրանց միջից և վերջապես տեսնեն մեր հզոր հայրենիքի պայծառ ապագան:

-Պրն Իսպիրյան արդյո՞ք տեղյակ եք, որ նախագահի թեկնածու Անդրեաս Ղուկասյանը հացադուլ է անում:

-Անդրեաս Ղուկասյանին ես անձամբ եմ ճանաչում, մենք շատ մտերիմ ենք, նրան շատ եմ հարգում, ազնիվ և կիրթ երիտասարդ է, իսկ եթե նա այժմ հացադուլ է անում, դա նրա գործն է: Կուզենայի նրան տեսնել, եթե ոչ նախագահի' ապա որևէ այլ կարևորագույն պաշտոնում, քանի որ բավականին կիրթ անձնավորություն է: Եթե այսօր հացադուլ է անում, ուրեմն մի բան գիտի, ես չեմ կարող նրա քայլերը գնահատել: Նրա հայրենասիրության վրա էլ բնավ չեմ կասկածում:

-Փետրվարի 18-ին պատրաստվու՞մ եք կատարել Ձեր քաղաքացիական պարտքը:

-Իհարկե, անտարբեր չպետք է մնալ, բոլորն էլ պետք է մասնակցեն ընտրություններին:

-Իսկ ու՞մ եք պատրաստվում ընտրել:

-Ես լուռ կգնամ ընտրության, իսկ թե ում կընտրեմ՝ դա գաղտնիք է: Միգուցե ընտրեմ նաև գործող նախագահին:

-Իսկ Դուք քարոզարշավին մասնակցելու առաջարկություններ ստացե՞լ եք:

-Ինձ ոչ ոք չի առաջարկել, ինձ թվում է, որ իմ երաժշտությունը և երաժշտական ոճը քարոզարշավի համար չէ, քարոզարշավի համար ավելի շատ ռիթմեր են պետք, աշխույժ երաժշտություն:

-Դեռևս ծանոթ չեմ, բայց անպայման կծանոթանամ: