«Առաջարկը եղել է Սուջյանին, իսկ ես ցանկանում եմ «Դորիանսով» ներկայանալ». Գոռ Սուջյան

NEWS.am.STYLE-ի թղթակիցը զրուցել է «Դորիանս» խմբի մենակատար, Հայաստանը «Եվրատեսիլ-2013»-ում ներկայացնող Գոռ Սուջյանի հետ:

Շնորհավորում եմ: Սպասելի՞ էր, որ Հանրային հեռուստաընկերությունը հենց Ձեզ կընտրի:

Ճիշտ ասած, չէի սպասում: Անակնկալ էր ինձ համար: Ընդհանրապես այս տարի հետարքրքված չէի «Եվրատեսիլով», զբաղված էինք խմբով' նոր ալբոմ, ԱՄՆ մեկնելու ծրագրեր եւ այլն: Ինձ զանգահարեցին երեկ երեկոյան, այսօր հանդիպեցի Հայաստանի Հանրային հեռուստաընկերության խորհրդի նախագահ Ալեքսան Հարությանյանի հետ, առաջարկը ստացա, եւ բնականաբար, չէի կարող մերժել, որովհետեւ առաջարկը հաճելի է: Համենայն դեպս, շատ ուրախ եմ:

Խմբի անդամների հետ զրուցե՞լ եք:

Քանի որ հապճեպ է եղել ամեն ինչ, դեռ մեր տղաների հետ եմ հանդիպելու, նրանց կարծիքը չեմ կարող ասել, չեմ խոսել նրանց հետ: Հանրային խորհրդից առաջարկը եղել է Սուջյանին, իսկ ես ցանկանում եմ «Դորիանսով» ներկայանալ:

Նախորդ տարվա նեղվածությունն անցա՞վ, որովհետեւ նախորդ տարի Դուք շատ էիք ցանկանում մասնակցել «Եվրատեսիլ-2012»-ին, սակայն չմասնակցեցիք:

Նեղվածություն բացարձակապես չի եղել: Նախորդ տարի մրցույթին չմասնակցելը պայմանավորված էր քաղաքականությամբ: Մրցույթին մասնակցությունը կապված էր Հայաստանի նկատմամբ թշնամաբար տրամադրված երկիր այցելելու հետ: Մենք ոչ մի ամբիցիա չենք ներկայացրել, ընդամենն ասել ենք, որ եթե մասնակցության որոշում կայացվի, ապա պատրաստ ենք գնալ:

Երգի ընտրությունը կատարելու է հեռուստադիտողը եւ ժյուրին: Դուք երգի հայտ ներկայացնելո՞ւ եք: Ի՞նչ ժանրում կցանկանայիք հանդես գալ:

Տարբեր կոմպոզիտորներ կներկայացնեն երգեր: Մենք եւս երգ կգրենք եւ կներկայացնենք: Բնականաբար, կցանկանանք մեր ոճով հանդես գալ: Մենք մեր ոճն ինչ-որ չափով գտել ենք, աշխատում ենք այն զարգացնել: Չենք ցանկանա դրանից դուրս գալ: Ներկայացնում ենք ռոք, բայց «Եվրատեսիլում» որ ժանրով հանդես կգանք, չեմ կարող ասել: Առաջինը պետք է մտածեմ ելույթի մասին, թե ոնց եմ երգելու, իսկ մնացած հարցերի շուրջ կխորհրդակցեմ մասնագետների հետ։

Ի՞նչ ես անելու «Եվրատեսիլիսի» բեմում:

Չեմ ցանկանում խոստանալ, որ ինչ-որ տեղ կգրավեմ: Կարող եմ խոստանալ, որ առավելագույնս կփորձեմ ապահովել երաժշտական որակը: Ինձ թվում է հանդիսատեսին երաժշտությամբ կարող եմ ոգեւորել, հանդիսատեսն էլ ինձ' իր խոսքերով, ողջույններով:

Հիշեցնենք, որ Հայաստանի Հանրային հեռուստաընկերության գեղարվեստական հանձնաժողովի ներքին ընտրությամբ 2013թ.-ի Եվրատեսիլ երգի մրցույթին Հայաստանը կներկայացնի երգիչ Գոռ Սուջյանը: Երգի ընտրությունը կկատարվի ազգային ընտրությամբ' հեռուստադիտողների sms հաղորդագրությունների եւ պրոֆեսիոնալ ժյուրիի քվեարկությամբ:Հայաստանյան ազգային ընտրությունը կկայանա մարտի 2-ին Առաջին ալիքի ուղիղ եթերում, որի ընթացքում Գոռ Սուջյանը կկատարի երգի մրցույթին ներկայացված լավագույն երգերը: Եվրատեսիլ 2013 կմեկնի այն երգը, որը ժյուրիի եւ հեռուստադիտողների քվեարկության (50/50) արդյունքում կհավաքի ամենաբարձր միավորները:

Հայտարարված երգի մրցույթին կարող են մասնակցել հեղինակներ ինչպես ՀՀ-ից այնպես էլ արտերկրից: Հայտերն ընդունվում են մինչեւ ս.թ.-ի փետրվարի 20-ը: Մանրամասներ կարող եք գնտել www.1tv.am կայքում: