«Ժողովուրդ». Երևանի վարչական շրջանները պետք է ունենան իրենց ֆեյսբուքյան էջերը

Ըստ «Ժողովուրդ»-ի տեղեկությունների՝ Երևանի քաղաքապետ Տարոն Մարգարյանը պաշտոնապես հանձնարարական է տվել, որ
յուրաքանչյուր վարչական շրջան պետք է ունենա իր ֆեյսբուքյան էջը (վարչական շրջանի ղեկավարի, տեղակալի, աշխատակազմի
ղեկավարի դեմքերով): Ավելին, դրանք պետք է սպասարկեն հատուկ մասնագետներ: Այսինքն՝ ««Ֆեյսբուք»-ի հաստիքով» մարդիկ են
աշխատում վարչական շրջաններում: Երևանի քաղաքապետի ֆեյսբուքյան էջի պատասխանատու Մարիա Բարաղամյանը, սակայն, «Ժողովուրդ»-ի հետ զրույցում ասաց. «Հանձնարարական չկա, ուղղակի վարչական շրջանի ղեկավարն իր աշխատանքն է լուսաբանում: Դա հնարավորություն է քաղաքացիների հետ շփման և կապի միջոց է: Վարչական շրջանների ղեկավարները, ինչպես նաև աշխատակազմը, ունեն ֆեյսբուքյան էջեր: Բայց դրա համար հատուկ աշխատող չեն պահում: Ուղղակի աշխատակազմում կան մարդիկ, որոնք դրա պատասխանատուն են: Դրա համար հատուկ մարդ չի կարող լինել, որովհետև հաստիքացուցակում էլ նման հաստիք չկա»: