Յուրաքանչյուր հայ ֆուտբոլիստ իր ջանքերի 100%-ով փորձում է օգնել հավաքականին. Հենրիկ Մխիթարյան

Դոնեցկի «Շախտյորի» կիսապաշտպան Հենրիկ Մխիթարյանը Sportbox.ru-ին տված հարցազրույցի ընթացքում խոսել է Չեմպիոնների Սուպերգավաթի համար պայքարում «Զենիթի» նկատմամբ տարած հաղթանակի մասին։

- Ինչո՞ւ «Շախտյորը» այդքան հեշտ հաղթեց «Զենիթին»։

- Կարծում եմ թիմերը նախապատրաստական տարբեր փուլերում են, դրանով էլ պայմանավորված էր տարբերությունը: Խաղը մեզ համար սկզբունքային չէր: Լավ էր, որ հաղթեցինք: Այժմ հիանալի տրամադրությամբ պատրաստվում ենք Copa del Sol-ին:

- Լուրեր էին պտտվում, որ դուք հնարավոր է տեղափոխվեք պետերբուրգյան ակումբ։

- Դրանք ընդհամենը խոսակցություններ են: Այժմ «Շախտյորի» խաղացող եմ և այլ բանի մասին չեմ մտածում։

- Ինչքանո՞վ եք պատրաստ Չեմպիոնների լիգայի շրջանակներում «Բորուսիայի» դեմ կայանալիք հանդիպմանը։

- Չեմ կարող ասել պատրաստվածության մասին, դա ավելի հստակ կարող է ասել մարզիչը: Կաշխատենք այնպես, ինչպես կասի մարզիչը: Համոզված եմ դորտմունդցիների դեմ խաղին մարտական կներկայանաք: 

- Ինչու՞ իրենց ակումբներում հիանալի հանդես եկող հայ ֆուտբոլիստներն այդքան էլ լավ չեն հանդես գալիս հավաքականում։

- Դժվար է ասել: Բոլոր այն ֆուտբոլիստները, ովքեր գալիս են թիմ, ամեն ինչ անում են, որպեսզի հավաքականին օգնեն հաղթել: Յուրաքանչյուրը իր ջանքերի 100%-ով փորձում է օգնել հավաքականին: Չեմ կարծում, որ որևէ ֆուտբոլիստ իրեն թույլ է տալիս թերանալ:

- Ձեզ անվանում են հետխորհրդային տարածքի լավագույն ֆուտբոլիստ: Չկա՞ արդյոք ցանկություն ուժերը փորձել արևմտյան Եվրոպայում:

- Գործող պայմանագիր ունեմ «Շախտյորի» հետ, այդ պատճառով ոչինչ չեմ կարող ասել այդ մասին: