Քննում ենք Լիլիթ Հովհաննիսյանի, Արմինկայի և մյուսների դիմահարդարումը

Այս անգամ հայտնիներից շատերը կրկին հայտնվեցին Fashion Police-ի «դիմահարդարման բաժանմունքում», որտեղ նրանց դիմահարդարումն ու ոճը քննության ենթարկեց դիմահարդար-ոճաբան Յանա Բաբաջանյանը: Դիմահարդար-ոճաբանի հավաստմամբ, հայ հայտնիներն իրենց ոճը փոփոխելու բարդույթ ունեն. ընտրում են որևէ ոճ, հետո վախենում են, որ ոճաբանը կամ դիմահարդարը կարող են փչացնել այն, ինչն, ըստ Յանայի, սխալ է:

Սիլվա Հակոբյանն ինձ դուր է գալիս: Դիմահարդարումը ևս հավանում եմ, միայն դուր չի գալիս նրա ոճը: Երբեմն մտածում եմ, որ նա ոճաբան չունի: Այստեղ դիմահարդարումը առօրյա է և նուրբ, ինչի հետ ականջօղերը կապ չունեն:

Սյուզի Մելիքյանը շատ վառ է հագնվում, շատ աքսեսուար է օգտագործում ու շատ է դիմահարդարվում: Խնդիրն այն է, որ այս ամենն օգտագործվում է առօրյայում: Խորհուրդ կտայի առօրյայում շատ չշպարվել, որպեսզի տարբերվի ու միանման չլինի: Մեկ անգամ եմ աշխատել նրա հետ և անգամ այդ ժամանակ ինձ խնդրել է դիմահարդարել այնպես, ինչպես միշտ դիմահարդարվում է: Խորհուրդ կտայի թեթևացնել ոճը' դիմահարդարումից սկսած:

Զարուհին այստեղ ավելի հետաքրքիր է: Մի կնոջ ոճում է, ով շատ բանի է հասել կյանքում, ինքնավստահ է և շատ գեղեցիկ: Շատ նուրբ դիմահարդարում է, հագուստին էլ' համապատասխան: Հավանաբար ինքնուրույն է շպարվել, քանի որ աշխատանքը մաքուր չէ, իսկ երգչուհին պարտավոր էլ չէր մասնագետի պես շպարել:

Այս լուսանկարում Եվա Ռիվասի դիմահարդարումը շատ լավ է արված: Նրան նախ պետք է նրբացնել: Շատ գեղեցիկ դիմագծեր ունի: Մի խնդիր կա միայն, Եվային շատ հեշտ է «փչացնելը»: Երբ կինը խոշոր դիմագծեր ունի, կարող ես հեշտությամբ կոպտացնել ու տգեղացնել նրան: Այստեղ մասնագետը երեկոյան նուրբ դիմահարդարմամբ կարողացել է նրբացնել երգչուհու դիմագծերը:

Անի Քրիստիի մեջ գնահատում եմ համարձակությունը: Միշտ վստահում է մասնագետներին, ովքեր աշխատում են իր հետ: Դրա համար էլ համերգներին և տեսահոլովակներում միշտ տարբեր է լինում: Ճիշտ է աշխատում և փոփոխվելու բարդույթ չունի: Այստեղ երեկոյան դասական դիմահարդարում է արված: Սխալ ոչինչ չկա: Ուղղակի հարսանեկան դիմահարդարման համար դեմքի արտահայտությունը շատ ագրեսիվ է:

Աննա Խաչատրյանին ծանոթ չեմ: Հետաքրքիր է համադրված աչքերի գույնը շրթներկի գույնի հետ: Ստվերաներկը բաց մանուշակագույնից մուգ մանուշակագույնի է անցնում, ինչը վատ չէ: Սխալ է սանրվածքը, իր դիմագծերն արտահայտիչ են և նման վարսահարդարում պետք չէր անել: Վարսահարդարն աշխատելիս պետք է ուշադրություն դարձնի նաև դիմագծերին: Սա կարելի է կոկտեյլային դիմահարդարում համարել:

Արմինկայի հետ շատ եմ աշխատել. նա գիտի' ինչ է ուզում, դիմագծերը շատ գեղեցիկ են և նրա հետ աշխատելիս հաճույք եմ ստանում: Ոճային է, ինչ դիմահարդարում էլ արվում է, շատ գեղեցիկ է նայվում: Արմինկան նկարահանումների պատճառով հաճախ է ողջ օրը լինում երեկոյան դիմահարդարմամբ: Դիմահարդարումն ընդհանուր առմամբ գրագետ է արված, աչքերը ճիշտ են ընդգծված, ինչն էլ խոշորացրել է դրանք:

Լիլիթ Հովհաննիսյանի հետ չեմ աշխատել, բայց հիացած եմ նրանով: Ճիշտ է դիմահարդարվում: Ճիշտ ոճ է ընտրել և, իմ կարծիքով, թերություն չկա: Պարզապես միշտ նույն դիմահարդարմամբ է, իսկ քանի որ ոճային է, խորհուրդ կտամ երբեմն փոխել դիմահարդարումը: Կարծում եմ' ոճաբանի կարիք չունի: Առօրյա շատ գրավիչ դիմահարդարում է:

Հասմիկ Կարապետյանին այստեղ սխալ դիմահարդարում է արված: Նա պարզ, նուրբ երգչուհի է և նրա համար սա կեղծ դիմահարդարում է. այդ մասին են վկայում անգամ աչքերը: Երեկոյան այս դիմահարդարմամբ փորձել են գործնական ու ինքնավստահ կնոջ կերպար ստանալ, բայց սա Հասմիկ Կարապետյանը չէ:

«Ե՞ս Yes!» ամսագիր, արխիվ