Բակո Սահակյանի գնահատականը հարկային պետական ծառայության աշխատանքին

Արցախի Հանրապետության Նախագահ Բակո Սահակյանը հունվարի 23-ին այցելել է ԼՂՀ ԿԱ հարկային պետական ծառայություն:
Նախագահը ծանոթացել է գերատեսչության շենքային եւ աշխատանքային պայմաններին: Բակո Սահակյանը կարեւորել է ժամանակակից չափանիշներին համապատասխան աշխատանքային պայմանների առկայությունը՝ ընդգծելով, որ այն իր դրական ազդեցությունն է թողնում համակարգի գործունեության վրա:

Այնուհետեւ երկրի ղեկավարը մասնակցել է հարկային պետական ծառայության հաշվետու խորհրդակցությանը:

Կառույցի աշխատանքների մասին զեկույցներով հանդես են եկել ծառայության պետ Արտակ Բալայանը եւ գերատեսչության տարբեր ստորաբաժանումների պատասխանատուները:

Նախագահ Սահակյանն իր խոսքում բավարար է գնահատել հարկային պետական ծառայության աշխատանքը՝ հավելելով, որ հաշվետու ժամանակաշրջանում կառույցի գործունեության գրեթե բոլոր ոլորտներում արձանագրվել են բարձր ցուցանիշներ:

Երկրի ղեկավարն ընդգծել է, որ դրական տեղաշարժերի հետ մեկտեղ ոլորտում կան նաեւ շատ անելիքներ: Որպես ռազմավարական ամենակարեւոր խնդիր՝ Բակո Սահակյանը նշել է տնտեսության մեջ սեփական ներուժի բնականոն զարգացման խթանումը: Նախագահի խոսքով՝ պետք է անել ամեն ինչ, որպեսզի հարկահավաքման գործընթացը խոչընդոտ չհանդիսանա ձեռնարկատիրական գործունեության, հատկապես՝ փոքր եւ միջին բիզնեսի զարգացման համար, ինչը չափազանց կարեւոր է հանրապետությունում միջին խավի ձեւավորման համար:

Նախագահ Սահակյանը կոնկրետ հանձնարարականներ է տվել գերատեսչության ղեկավարությանը աշխատանքների պատշաճ իրականացման ուղղությամբ՝ նշելով, որ հանրապետության իշխանությունները կշարունակեն մշտական աջակցություն ցուցաբերել համակարգին՝ ուշադրության կենտրոնում պահելով նրա հիմնախնդիրներն ու դրանց լուծման գործընթացը:

Միջոցառմանը մասնակցում էին ֆինանսների եւ էկոնոմիկայի նախարար Սպարտակ Թեւոսյանը, պաշտոնատար այլ անձինք: