Վրաստանում ազատ են արձակել խորհրդարան չներկայանալու համար դատապարտված ընդդիմադիր Գվարամիային

«Ախալի» ընդդիմադիր կուսակցության առաջնորդ Նիկա Գվարամիան, որը դատապարտվել էր Վրաստանի նախկին նախագահ Միխեիլ Սաակաշվիլիի (2004–2012 թթ.) կառավարման ժամանակաշրջանի հանցագործությունները քննող խորհրդարանական հանձնաժողովի նիստին չներկայանալու համար, ազատ է արձակվել։

 

Գվարամիայի ազատ արձակման կադրերը ուղիղ եթերում հեռարձակել են տեղական հեռուստաընկերությունները։

Թբիլիսիի քաղաքային դատարանը 2025 թվականի հունիսին Գվարամիային դատապարտել էր ութ ամսվա ազատազրկման՝ խորհրդարանական հանձնաժողովի նիստին չներկայանալու համար։ Նրան հանձնաժողովի նիստին կանչել էին ապրիլին, սակայն նա հրաժարվել էր ներկայանալ խորհրդարան և ցուցմունք տալ։

 

Գվարամիայից բացի, խորհրդարանական հանձնաժողովի նիստին չներկայանալու համար դատապարտվել են նաև ընդդիմադիրներ Զուրաբ Ջափարիձեն, Գիորգի Վաշաձեն, Նիկա Մելիան, պաշտպանության նախկին նախարար Իրակլի Օքրուաշվիլին, ինչպես նաև ընդդիմության կողմնակից, խորհրդարանի նախկին պատգամավոր Գիվի Թարգամաձեն։

 

Հանձնաժողովի նիստին չներկայանալու համար ազատազրկում էին կրում նաև «Ուժեղ Վրաստան» ընդդիմադիր կոալիցիայի առաջնորդներ Մամուկա Խազարաձեն և Բադրի Ջափարիձեն, սակայն Վրաստանի նախագահ Միխեիլ Կավելաշվիլին սեպտեմբերին նրանց ներում էր շնորհել։ Անցյալ տարվա դեկտեմբերին բանտից ազատ էր արձակվել Զուրաբ Ջափարիձեն։ Հունվարին քրեակատարողական հիմնարկը լքել էին Վաշաձեն և Թարգամաձեն։