Էլլա Տարունցի որդին ծառայությունից վերադարձել է տուն

Էլլա Տարունցը BRAVO.am-ի հետ զրույցում նշել է, որ 2012-ն իր համար արգասաբեր է եղել: Այս տարին էլ երգչուհու համար, իր խոսքով, բարի է սկսվել:): Նա շարունակվում է նկարահանվել “Եռաչափ սեր” հեռուստասերիալում, օրերս “Բայց դու” երգի հիման վրա նկարահանված տեսահոլովակ է ներկայացրել, նոր ձայնասկավառակ ունի:

Հեղինակ կատարող, հեռուստառադիոհաղորդավար, դերասանուհի. բոլորն էլ ինձ հարազատ են եւ միմյանցից զատել չեմ կարողանում:

1990-ականներին FM 105.5 ռադիոկայանով վարել եմ “Լիալուսին” գիշերային հաղորդումը:

20 տարի է, ինչ երգում եմ: Մասնագիտությամբ վոկալիստ եմ, ունեմ դասական երգչուհու կրթություն:

Երգում եմ այն, ինչ զգում եմ, ինչի մասին մտածում եմ:

Երգերս հիմնականում զգացմունքային են:

Ստեղծագործական կյանքում պայմանական լռությունս ուներ իր պատճառը. հոգնել էի: Ժամանակ առ ժամանակ դադար եմ վերցնում, որովհետեւ եթե մի բան անում եմ, պիտի սիրով ու հաճույքով անեմ, հակառակ դեպքում անիմաստ է:

Բոլոր աշխատանքները հաճույքով եմ արել ու անում:

Հայկական շոու բիզնեսին դրական եմ վերաբերվում. անում են այն, ինչ կարողանում են, ավելին պարզապես հնարավոր չէ, քանի որ շուկա չունենք:

Տոնական օրերս գործնական էին ու ակտիվ, ինչի համար ուրախ եմ:

Այս տարին համարում եմ անակնկալների տարի: Լավատես եմ ու դեռ չեմ սխալվել:

Նոր տարին սկսվեց շատ բարի. տղաս՝ Խորենը, ավարտեց ծառայությունը հայոց բանակում:

2012-ին շատ եմ աշխատել, արգասաբեր տարի էր՝ հեռուստասերիալ, նոր տեսահոլովակ ու ձայնասկավառակ: CD-ն ներառում է 12 երգ, որոնցից 9-ը հեղինակել եմ ես, իսկ մյուսները քաղաքային ֆոլկ են: