Կոչ Հայոց բանակին

Մենք այն քաղաքացիներն ենք, ովքեր 2013թ. հունվարի 11-ին հանդես եկանք ընտրությունների ժամանակ Սահմանադրության պահանջներին ենթարկվելու՝ իրավապահ մարմիններին եւ բանակին ուղղված պահանջով: Մեր ձայնը լսելի եղավ ՀՀ ոստիկանության կողմից, որը հունվարի 15-ին հաստատեց իր պատրաստակամությունը՝ գործել իր պարտականությունների եւ լիազորությունների շրջանակում ՀՀ Սահմանադրության եւ օրենքներով երաշխավորված՝ ընտրելու եւ ընտրվելու իրավունքի անշեղ իրականացումն ապահովելու համար: Սակայն ՀՀ պաշտպանության նախարարությունից նմանատիպ հայտարարություն չհնչեց: Դրա փոխարեն նույն օրը Հայաստանում ծավալվող նախընտրական գործընթացի խորապատկերին տեղի ունեցավ ՀՀ նախագահի պաշտոնը զբաղեցնող Սերժ Սարգսյանի այցը ՀՀ պաշտպանության նախարարություն:

Հարկ է նշել, որ հունվարի 15-ին Սերժ Սարգսյանի կողմից զինված ուժերի բարձրագույն սպայակազմի, ինչպես նաեւ օրենսդիր, գործադիր, դատական իշխանությունների ղեկավարության հետ ընդլայնված կազմով նիստի անցկացումը առաջացրել է հանրության առանձին շերտերի թերահավատությունը: Կասկած է հայտնվում, որ այդ հանդիպմամբ կարող են կյանքի կոչվել այնպիսի ապօրինի հրամաններ, որոնք բանակին ընտրական շրջափուլում կդնեն անօրինականություններ գործելու երկընտրանքի առջեւ: Միաժամանակ, Սահմանադրության պահանջներով առաջնորդվելու հավաստիացումը ստանալու նպատակով ՀՀ պաշտպանության նախարարությանն ուղղված մեր պահանջի անտեսումը լրացուցիչ հիմքեր է ստեղծում մտածելու համար, որ նման կասկածները կարող են երբեւէ իրականություն դառնալ:

Վերոնշյալը մեզ ստիպում է դիմել բանակում զինվորական ծառայություն իրականացնող մեր քաղաքացիներին՝ ամենայն պատասխանատվությամբ վերաբերվել իրենց սահմանադրական պարտավորություններին եւ երբեւէ չենթարկվել հնարավոր անօրինական հրամանների, ինչի ականատեսը մեր հանրությունը եղել է անցյալ նախագահական ընտրությունների ժամանակ: Համոզված ենք, որ թե՛ սահմաններում իր պարտականությունները կատարելու եւ թե՛ ընտրություններով պայմանավորված՝ երկրում ծավալվող ներքաղաքական գործընթացների ընթացքում մեր զինված ուժերը եւ իրավապահ մարմինները կդրսեւորեն քաղաքացիական բարձր գիտակցություն եւ դուրս չեն գա Սահմանադրությամբ վերապահված իրենց իրավունքների ու պարտականությունների շրջանակից: Սակայն եթե անօրինական հրամանների ներքո գործելու խնդիր ծագի, ապա մենք պատրաստ ենք լինել Հայոց բանակի բոլոր այն զինծառայողների կողքին, ովքեր չեն ենթարկվի այդ հրամաններին ու իրենց քաղաքացիական գիտակցությամբ կգործեն հանուն մեր պետության եւ ժողովրդի:

Խաչատրյան Աշոտ
Կոստանյան Նարեկ
Հարությունյան Կարեն
Ղազարյան Արթուր
Մամյան Սևակ
Մարգարյան Միհրան
Մինասյան Վահագն
Սարոյան Սարո