Վրաստանը հրաժարվում է միանալ հակառուսական պատժամիջոցներին․ Թբիլիսին խոսում է ազգային շահերից

Վրաստանը չի պատրաստվում սահմանել պատժամիջոցներ Ռուսաստանի դեմ, քանի որ դա հակասում է երկրի ազգային շահերին և չի հանգեցնի Մոսկվայի թուլացմանը։ Այս մասին հայտարարել է Վրաստանի արտաքին գործերի նախարար Մակա Բոչորիշվիլին՝ փոխանցում է newshub.ge-ն։

«Մենք չենք կարող և չենք պատրաստվում պատժամիջոցներ կիրառել Ռուսաստանի նկատմամբ, քանի որ դա իրականում որևէ ազդեցություն չի ունենա Ռուսաստանի վրա, սակայն զգալի ազդեցություն կունենա Վրաստանի վրա», — նշել է դիվանագետը։ Նրա խոսքով՝ նման քայլը երկրի համար կստեղծի լուրջ անվտանգության ռիսկեր։

Բոչորիշվիլին նաև ընդգծել է, որ արևմտյան պետությունները հրաժարվում են Թբիլիսիին տրամադրել անվտանգության հստակ երաշխիքներ։ Ավելի վաղ Վրաստանի ԱԳՆ-ն Լոնդոնի կողմից «Իմեդի» և «Postv» հեռուստաընկերությունների նկատմամբ սահմանված պատժամիջոցների պատճառով գերատեսչություն էր հրավիրել Մեծ Բրիտանիայի դեսպան Գարեթ Ուորդին։ Բրիտանական կողմը այդ մեդիա ընկերություններին մեղադրել էր Ուկրաինայի շուրջ հակամարտության վերաբերյալ ապատեղեկատվություն տարածելու մեջ։