«Պրագմատիկ» ԲՀԿ-ականներ

Նախագահական քարոզարշավի ծավալմանը զուգընթաց սեփական դիրքորոշում արտահայտող ԲՀԿ-ականների թիվը սկսում է մեծանալ: Եվ որպես կանոն, ԲՀԿ-ից անկախ դիրքորոշում ունեցողների դիրքորոշումները համընկնում են միևնույն՝ Սերժ Սարգսյանին սատարելու պահով: Մեր տեղեկություններով՝ Գյումրիում Սամվել Բալասանյանի օրինակին է որոշել հետևել նաև Մարտուն Գրիգորյանը և սկսել է կոնկրետ աշխատել Սերժ Սարգսյանի օգտին: «Դե, էդքան բիզնեսներ ունի, բա ի՞նչ պիտի աներ»,- Գրիգորյանի որոշումը հենց այսպես են մեկնաբանում տեղում:

ԱԺ պատգամավոր Մարտուն Գրիգորյանը Գյումրու առանցքային դեմքերից մեկն է: Գյումրիում դեռևս պահպանվել են, այսպես ասած, կլանները, որոնցից մեկի ներկայացուցիչը հենց ԱԺ գյուղատնտեսական և բնապահպանական հարցերի մշտական հանձնաժողովի նախագահն է: Գրիգորյանը նաև բիզնեսների տեր է: Այնպես որ այն, ինչ կարող էր թերևս անցնել խորհրդարանական կամ տեղական ինքնակառավարման մարմինների ընտրություններում (սեփական խաղ տանելը կամ, որ ավելի վատ է, ՀՀԿ-ին մրցակից թեկնածուի օգտին ավելի շատ միավորներ հավաքելը), հնարավոր է, որ Հայաստանի նման պետության գլխավոր ընտրություններում արդեն թույլ չտրվեր: Այն, ինչ կարող էր ներվել այլոց հանդեպ, դժվար թե ներվեր նախագահի դեպքում: Հենց այս իրողությունն է, որ, ըստ էության, գիտակցեց ԲՀԿ-ական պատգամավորը և ճիշտ կողմնորոշվեց: Հատկապես, որ իր քաղաքական ուժը գնաց քաղաքական կառույցի համար զրոյացման վտանգ ունեցող քայլի և որոշեց նախագահական ընտրություններին ո՛չ մասնակցել, ո՛չ էլ վերաբերմունք դրսևորել: Դե, եթե ԲՀԿ-ն որոշել է ինքն իրեն պահել նման անհասկանալի ձևով, ինքն իրեն դնել ապաքաղաքական կառույցի տեղ (այս առումով, կարծում ենք, մեկնաբանություններն ավելորդ են այլևս, ամեն ինչ ավելի քան հասկանալի է), հո չե՞ն կարող ԲՀԿ-ին ինչ-ինչ նկատառումներից ելնելով անդամագրվածները դառնալ նույն ԲՀԿ-ի զոհերը: Մանավանդ՝ Մարտուն Գրիգորյանի նման մեկը՝ ջահել, «կյանքը դեմը», եռանդը տեղը, լուծման սպասող գյուղատնտեսական հարցերի բեռն էլ՝ վզին:

Այնպես որ, այս ամենը հաշվի առնելով, երևի թե արժե միմիայն հարգանքով մոտենալ ԲՀԿ-ական այս պատգամավորի որոշմանը՝ ինչ-որ տեղ հիանալով նաև երիտասարդ գործչի պրագմատիզմով: Իր պրագմատիկ մտածողության շնորհիվ կայացրած ճիշտ որոշմամբ Մարտունը կարողացավ ոչ միայն զուտ սեփական անձի ապագայի հարցը լուծել, այլև իր խոսքին սպասողներին չթողեց վատ վիճակի մեջ: Այժմ ազատ գործելու հնարավորություն ստացան ոչ միայն Գյումրվա «մարտունգրիգորյանական» կլանի անդամները, այլև բիզնեսմեն Գրիգորյանի աշխատողները, որոնցից և ոչ մեկին չէր կարող ընտրություններին չմասնակցելը որևէ օգուտ բերել:

Պրագմատիկ որոշում կայացնողների մեջ է նաև Ծառուկյանի փեսան՝ Կարո Գուլոյանը: Աբովյանի քաղաքապետն իր աշխատասենյակում է հավաքել համայնքապետերին և հանձնարարել աշխատել Սերժ Սարգսյանի օգտին: Հանդիպմանը ներկա է գտնվել նաև Աբովյանի ՀՀԿ կառույցի ղեկավարը: Ներկաները, զարմանքը զսպելով, լսել են, թե ինչ խանդավառությամբ է ԲՀԿ ղեկավարի փեսան, ով մի երկու օր առաջ տրամագծորեն հակառակ բովանդակության ելույթներ էր ունենում, այժմ կոչ է անում հաղթանակ ապահովել Սերժ Սարգսյանին:

Հիշյալ պրագմատիկներից շատ ավելի ռադիկալ քայլերի է պատրաստ Գագիկ Ծառուկյանի «սան» Հրաչյա Ռոստոմյանը:

Սպորտի և երիտասարդության նախարարն այս օրերին Ծառուկյանի «գրկից» դեպի Սերժ Սարգսյանի շրջապատ թռիչք կատարելու տենդագին որոնումների մեջ է: Ծառուկյանի շնորհիվ նախարար դարձած այս անձնավորությունը հասկացել է, որ ընտրություններից հետո իր զբաղեցրած պորտֆելն այլևս Ծառուկյանին չի նվիրաբերվելու: ՀՀԿ-ն, միայնակ հաղթանակ տանելով և լեգիտիմության խնդիր չունենալով, այսուհետ դժվար թե որևէ մեկին ավելորդ զոհողություններ անի, հատկապես, որ այդ զոհողությունները միայն վնաս են հասցնում պետությանը, և դուրս կհրավիրի ինքն իրեն «ի տարբերություն նախորդ մի շարք նախարարների, սպորտի ասպարեզում մեծ հեղինակություն վայելող» հռչակած նախարարին: Հենց այս տեսլականից ելնելով՝ Ռոստոմյանն այժմ փորձում է ելք որոնել: Այս պահի դրությամբ, նախարարի մտավոր կարողությունները բավարարում են միայն «փիառշիկներ» վարձելու և սեփական անձի մասին լեգենդներ հյուսելու համար: Միաժամանակ փորձ է արվում նաև «մեսիջներ» տեղ հասցնել առ այն, թե «նման հեղինակություն վայելող» Հրաչյա Ռոստոմյանը պատրաստ է այլևս «պրիզնատ չգալ» Ծառուկյանին՝ հանուն Սերժ Սարգսյանի բարեհաճության և նախարարի աթոռի պահպանման:

Երբ Գյումրու քաղաքապետ Սամվել Բալասանյանը հայտարարեց Սերժ Սարգսյանին սատարելու մասին, դա թե՛ ինքը, թե՛ կուսակցությունը մեկնաբանեցին որպես զուտ անձնական որոշում և որակեցին իբրև սուբյեկտիվ վերաբերմունք: Սյունիք այցելության ժամանակ նախագահի կողքը երևալու համար ցուցադրաբար Սյունիք էր գնացել-հասել նաև ԲՀԿ-ական նախկին պատգամավոր, ծաղկաձորցի Մխիթար Հարությունյանը, ով նույնպես իր քայլը (Սերժ Սարգսյանին աջակցելը) որակեց որպես անձնական, ԲՀԿ-ից անկախ դիրքորոշում՝ որպես «ալիբի» օգտագործելով իր անդամակցած մեկ այլ կազմակերպության՝ «Երկրապահ կամավորական միության» գործոնը: Սերժ Սարգսյանին աջակցելու վերաբերյալ հայտարարությամբ հանդես եկավ նաև Սիսիանի ԲՀԿ-ական քաղաքապետ Աղասի Հակոբջանյանը:

Նախագահական քարոզարշավի ծավալմանը զուգընթաց, երևի թե, նման «սուբյեկտիվ» որոշումներ դեռ էլի կլինեն և երևի թե ամեն անգամ թե՛ իրենք՝ Սերժ Սարգսյանին սատարելու ցանկություն հայտնողները, թե՛ նրանց կուսակցությունները ստիպված կլինեն հանդես գալ հայտարարությամբ և բացատրել հանրությանը, որ որոշումը որևէ առնչություն չունի իրենց ներկայացրած քաղաքական ուժի դիրքորոշման հետ և որ իրենք պարզապես որպես անհատ են որոշել իրենց նախապատվությունը տալ դեռ էս գլխից ֆավորիտ հռչակված թեկնածուին: Բնականաբար, գնալով ՀՀԿ կլիենտուրան նորանոր, ավելի ու ավելի հետաքրքիր դեմքերով է հագենալու, որոնց առաջնորդելու է «պրագմատիզմը»: Իսկ որ պրագմատիզմը քաղաքականության մեջ միանգամայն ընդունելի կատերգորիա է, դժվար թե որևէ մեկը կարողանա ժխտել:

Լուսինե Կեսոյան