«Հրապարակ». Նախագահական ընտրությունների «նոու հաուները»

Ինչպես տեղեկացնում են «Հրապարակ»-ի աղբյուրները՝ ընտրական հանձնաժողովներում տեղերն այս տարի չեն վաճառվում: Բանն այն է, որ հանձնաժողովի անդամները որոշակի աշխատավարձ են ստանում, և քանի որ այս ընտրություններում «փող» չի շարժվելու, հանձնաժողովի տեղերի համար գնորդ էլ չկա: Նախորդ ընտրություններում օլիգարխները «բիրիքով» առնում էին հանձնաժողովականների տեղերը, որովհետև այդպես ավելի էժան էր, քան ամեն ընտրողին փող տալը:

Սա այս նախագահական ընտրությունների միակ «նոու հաուն չէ», որոշվել է նաև, որ մեքենաներով ընտրողներին ընտրատեղամասեր
չբերեն: Ծայրահեղ դեպքերում է պետք կիրառել այդ «սերվիսը»: Եվ քանի որ ընտրությունների միակ խնդիրը մասնակցության հարցն է, ՀՀԿ-ն՝ իր, ՕԵԿ-ն իր կուսակցականների վրա պարտադիր պլան է դրել, թե ով ինչքան «հարևան-ծանոթ» ունի, պետք է բերի քվեարկության:

Ի դեպ, եթե նախորդ նախագահական ընտրություններում Սերժ Սարգսյանին պաշտպանող ԲՀԿ-ն տարրալուծվել էր ՀՀԿ շտաբի կազմում և այդպես միասնական աշխատում-մասնակցում էր քարոզարշավին՝ մեկ տեղակալով, մեկ-երկու ներկայացուցչով, ապա այս ընտրություններում ՀՀԿ-ի միակ գործընկեր ՕԵԿ-ը «հանդես է գալիս» առանձին շտաբով, առանձին ծրագրով՝ զուգահեռ քարոզարշավով, որ ընտրություններից հետո իշխանական սեղանից փախցրած պատառն ավելի պատկառելի լինի: