Human Rights Watch-ը կոչ է արել ՀԱԿ ակտիվիստների գործի իրական հետաքննություն սկսել

Հայաստան 25 Հունվար, 2013 15:47

Human Rights Watch-ը, որն անկախ, միջազգային կազմակերպություն է և պաշտպանում է մարդու իրավունքները շուրջ 90 երկրում, այդ թվում՝ նաև Հայաստանում, նամակ է ուղարկել Հայաստանի Վճռաբեկ դատարան` իր անհանգստությունն արտահայտելով «Հայ ազգային կոնգրեսի» ակտիվիստներ Տիգրան Առաքելյանի, Արտակ Կարապետյանի, Սարգիս Գևորգյանի և Դավիթ Քիրամիջյանի նկատմամբ, բռնությունների արդյունավետ քննության բացակայության նկատմամբ:

Հիշեցնենք, որ 2012 թվականի հուլիսի 20-ին Երևանի Կենտրոն և Նորք Մարաշ շրջանի դատարանը դատապարտել էր ակտիվիստներին 2-6 տարի ազատազրկման: Օգոստոսի 20-ին ակտիվիստների պաշտպանական կողմը բողոք էր ներկայացրել ակտիվիստների նկատմամբ բռնությունների վերաբերյալ, սակայն բողոքը Վերաքննիչ դատարանի կողմից մերժվել էր, ապա՝ կրկին ներկայացվել: Վճռաբեկ դատարանն իր որոշումը պետք է ներկայացնի հունվարի 27-ին: Human Rights Watch-ը կոչ է արել դատարանին ուշադրություն դարձնել 2011-ի օգոստոսի 9-ին ոստիկանության կողմից գործադրվող բռնություններին:

Կազմակերպությունն իր նամակի մեջ անդրադարձել է օգոստոսի 9-ին ակտիվիստների և ոստիկանության միջև տեղի ունեցած բախումներին, որից հետո ակտիվիստները տեղափոխվել են ոստիկանություն: Կազմակերպությունը շեշտել է, որ ձերբակալվածները չեն իմացել ձերբակալության իրական պատճառը, և որտեղ են իրենց տեղափոխում: Նամակում նաև անդրադարձ է կատարվում բանտում այդ օրը ձերբակալվածների նկատմամբ կիրառվող բռնություններին: Այսպես, երբ իրավապաշտպաններ Վահե Հովսեփյանն ու Ստեփան Ոսանյանը ժամանել են տեսնելու ձերբակալվածներին, նրանք տեսել են ծեծի հետքեր վերջիններիս մարմնի վրա: Ակտիվիստներն իրենց բողոքն են ներկայացրել դատարան, սակայն թե ընդհանուր իրավասության դատարանը, թե՛ վճռաբեկ դատարանը թերացել են իրական հետաքննություն սկսել այս գործով:

Նամակում նաև նշված է, որ միջազգային կոնվենցիաները, որի անդամ է Հայաստանը, այդ թվում՝ Մարդու իրավունքների Եվրոպայի կոնվենցիան, Քաղաքական և քաղաքական իրավունքների միջազգային կոնվենցիան, ինչպես նաև ՄԱԿ-ի կոնվենցիան արգելում են որևէ նվաստացնող վերաբերմունք կամ պատիժ, և եթե Հայաստանը չհետևի այդ բանաձևերին, ապա Հայաստանի միջազգային պարտավորությունների իրական խախտում կդիտվի: