Ո՛չ ցիանիդին. գյուղացիները նախագահականի դիմաց

Այս պահին նախագահական նստավայրի դիմաց հավաքվել են Կոտայքի մարզի Մեղրաձոր գյուղի մի խումբ գյուղացիներ, ովքեր բողոքի ցույց են անցկացնում։ Ցույցի պատճառն այն է, որ Մեղրաձորում ցանկանում են ձուլարան բացել։ 

Գյուղացիներից մեկը Լուրեր.com-ի հետ զրույցում ասաց, որ այդ ձուլարանի կառուցումը կարող է վտանգ սպառնալ տեղի բնակիչների առողջությանը. երեխաները կարող են ծնվել լուրջ արատներով, քանի որ ձուլարանի բացումից հետո ցիանիդ անունով քիմիական նյութը կտարածվի ջրում և կթունավորի բնակիչներին։

Ըստ համայնքի բնակիչների՝ ձուլարանը ցանկանում է շահագործել քաղաքաշինության նախկին նախարար Վարդան Վարդանյանի խնամի  Վարդան Մարգարյանը։ 

Բողոքողներն իրենց ձեռքին ունեն «Ո՛չ ցիանիդին», «Հանուն մեր երեխաների», «Փրկի՛ր Մեղրաձորը» գրություններով պաստառներ։ Նրանցից մեկն էլ մեզ հետ զրույցում նշեց, որ գյուղապետը կողմ է շահագործմանը, և հավելեց. «Ես թքած ունեմ, թե որքան աշխատատեղ կբացվի, թող միլիոն հատ լինի, բայց ինչի՞ս է պետք, եթե երեխաներս արատով են լինելու։ Գյուղապետը կողմ է, քանի որ այնտեղ աշխատանք ունի։ Ես պահանջում եմ չշահագործել ձուլարանը, և մինչև վերջ մենք պահանջելու ենք դա»։ 

Բողոքի ակցիային մասնակցում էր նաև «Համայնք և Իրավունք» ՀԿ-ի նախագահ, իրավապաշտպան Սամվել Մկրտչյանը, ով իր ելույթում նշեց. «Այսօր մենք ունենք հստակ պահանջ՝ պետք է գործընթացը դադարեցնել, քննարկման նյութ կդառնա միայն բաց մշակման հանքը: Այլ քննարկումների մենք պատրաստ չենք: Մենք գիտենք մի բան՝ չի լինելու այդ գործարանը: Մենք փնտրում ենք այն համարձակ տղաներին, ովքեր կասեն կը-լի-նի: Մենք այդ մարդկանց ենք փնտրում, մենք այլ խնդիր չունենք: Մեր խնդիրը մեզ համար հստակ է, պարզ է:

Քննարկման նյութ կարող է լինել միայն բաց մշակման հանքը, որը, կհասկանանք, ինչու և ինչ եղանակով և ում դաբռոներով է այդ բաց հանքը շահագործվում այսօր, որը մեզ համար լրացուցիչ մեկ այլ աղետ է, իհարկե, չարիքի նվազագույնն է: Սակայն մենք ոչ մի բանի պատրաստ չենք:

Ցիանիդը պահում են միայն զոքանչների համար: Խիղճներդ կտրվի, ցիանիդը բերեն լցնեն գետերի մեջ, որոնցով գյուղացիները իրենց հողերն են ոռոգում»:

Վերջինիս խոսքով՝ գյուղացիների կողմից ուղարկված դիմումն ընդունվել է ընդունելությունների և դիմումների բաժնի ղեկավար Աիդա Սարգսյանի կողմից: