Վրաստանի քաղաքացուն Ռուսաստանում հեռակա կարգով դատապարտել են 28 տարվա ազատազրկման

Ռուսաստանի 2-րդ Արևմտյան շրջանային ռազմական դատարանը հեռակա կարգով 28 տարվա ազատազրկման է դատապարտել միջազգային հետախուզման մեջ գտնվող Վրաստանի 53-ամյա քաղաքացի Զազա Շոնիային։ Այդ մասին հայտնում է «Լենտա.ռու»-ն՝ հղում անելով Ռուսաստանի գլխավոր դատախազությանը։

Քննության տվյալներով՝ Շոնիան 2022 թվականի գարնանը ժամանել է Ուկրաինա և որպես վարձկան մասնակցել ռազմական գործողություններին՝ կռվելով Ուկրաինայի զինված ուժերի կազմում Ռուսաստանի դեմ։ Նշվում է, որ նա մասնակցել է նաև Կուրսկի մարզի տարածք ներխուժման գործողություններին և այդ ժամանակահատվածում վաստակել է մոտ 3.4 միլիոն ռուբլի։

Դատարանի վճռով նրան նշանակվել է 28 տարվա ազատազրկում, ինչպես նաև 1.6 միլիոն ռուբլու տուգանք։ Շոնիան գտնվում է միջազգային հետախուզման մեջ։