Հայաստանի թուրքական բռնազավթումն արդեն երևում է անզեն աչքով. Արմեն Այվազյան

Քաղաքական գիտությունների դոկտոր, պատմաբան Արմեն Այվազյանի ֆեյսբուքյան գրառումը․

Հայաստանի թուրքական բռնազավթումն արդեն երևում է անզեն աչքով։

«Ն. Փաշինյանը հայտարարում է, որ պետական պաշտոնյաներն այլևս իրավունք չունեն Արցախի անունը տալու և Արցախի պատմության մասին որևէ մեկին գիրք նվիրելու։ Եթե այսպես շարունակվի, շատ չանցած ՔՊ-ն գուցե սկսի նաև փողոցներում խարույկներ վառել ու դրանց մեջ նետել Արցախի պատմությանն ու մշակույթին նվիրված գրքերը։

Եկեք մենք էլ հակառակն անենք՝ գնենք և միմյանց, ինչպես նաև օտարերկրացիներին նվիրենք Արցախի մասին գրքեր։ Օրինակ՝ թեկուզ իմ հեղինակած և անցյալ տարի լույս տեսած այս գիրքը, որի թեման ու վերնագիրը, հավանաբար, ՀՀ կառավարությանն ու ՔՊ-ին դողերոցքի ու կատաղության մեջ կգցի՝

«ՀԱՅՈՑ ԶՈՐՔՆ ԱՐՑԱԽՈՒՄ 1722–1735 ԹՎԱԿԱՆՆԵՐԻՆ. ԿԱԶՄԱՎՈՐՈՒՄԸ, ԶԻՆՈՒՄԸ ԵՎ ՃԱԿԱՏԱՄԱՐՏԵՐԸ» (Երևան, 2025)։

Ինչո՞ւ եմ սա ասում։ Որովհետև գիրքը գիտելիք է, պատմությունը՝ իրավունք, իսկ ռազմական պատմությունը՝ ուժ և զենք։

Փաշինյանի ու ՔՊ-ի սկսած կռիվը հայոց գրքի և պատմության դեմ հուշում է, որ Հայաստանում հայերին արագորեն ուծացնելու թուրք-ադրբեջանական ծրագիրը մտնում է նոր փուլ։

Բայց այդ ծրագրի հեղինակներն ու իրագործողները մի փոքր խնդիր ունեն։ Հայերին միշտ բնորոշ է եղել մի հետաքրքիր վարքագիծ․ երբ ինչ-որ մեկը փորձում է արգելել մեր պատմությունը, մենք սովորաբար սկսում ենք այն ավելի շատ կարդալ, ավելի շատ գրել և ավելի շատ տարածել։

Այնպես որ, եթե օրվա դրածո իշխանավորներն իսկապես ցանկանում են, որ Արցախի մասին գրքերն արագ սպառվեն, ճիշտ ճանապարհի վրա են։ Թող շարունակեն նույն ոգով. գուցե վերջում նույնիսկ օգնեն, որ դրանք բեսթսելլեր դառնան...»,-Գրել է Այվազյանը։