Լանա Խաչատրյանն այս տարի աղի բլիթ չի ուտի

Երիտասարդների բարեխոս Սուրբ Սարգսի տոնին սպասում են բոլորը՝ և՛ սիրահարվածները, և՛ ամուսնական զույգերը, և՛ նրանք, ովքեր դեռևս չեն գտել իրենց կողակցին: Յուրաքանչյուրի ակնկալիքն ու երազանքը խիստ անձնական է, սակայն չամուսնացած և դեռևս սիրելի չունեցող երիտասարդներին միավորում է մի գեղեցիկ ավանդույթ: Իհարկե, խոսքն աղի բլիթի մասին է: Ըստ ավանդության՝ ուտելով աղի բլիթը, երազում ջուր կտա այն միակը, ում հետ վիճակված է ամուսնանալ: Հավատա՞լ, թե՞ ոչ, յուրաքանչյուրի իրավունքն ու ընտրությունն է:

Երգչուհի Լանա Խաչատրյանը շատ է սիրում Սուրբ Սարգսի տոնը և հավատում է նրա խորհրդին: «Շատ կարևորում եմ հենց Սուրբ Սարգսի տոնը՝ չնայած մեզանում մի ժամանակ ավելի տարածում էր գտել Սուրբ Վալենտինի տոնը: Հիմա ուրախ եմ, որ սիրում, հավատում և տոնում ենք մեր բարեխոսի տոնը»,- Armstar.am-ի հետ զրույցում ասել է Լանան:

Աղի բլիթ երգչուհին մեկ անգամ է կերել, փոքր տարիքում ու անմիջապես ջուր է խմել: Հետևաբար, սպիտակ ձիու վրա ասպետի փոխարեն հենց Լանան է իրեն ջուր «հյուրասիրել»: «Երազ չեմ տեսել: Եթե տեսնեի էլ, երևի չէի հիշի: Աղի բլիթն ինձ համար ուղղակի գեղեցիկ ավանդույթ է, որին ոչ վատ, ոչ էլ լավ եմ վերաբերվում»,- նշել է երգչուհին: Այս տարի նա չի պատրաստվում կրկին փորձել բախտը և ծարավ պառկել քնելու:

Այն հարցին, թե ինչպիսին պետք է լինի երիտասարդը, որ գրավի երգչուհու սիրտը, նա նշել է, որ երբեք իդեալներ ու պատկերացումներ չի ունեցել այս հարցի շուրջ: Կարծում է, որ պետք չէ առաջնորդվել դրանցով, քանի որ այն սահմանակափակում է մարդկանց: